Puoccâmpeiviruttâ
Kela máksá puácuvuođâ ääigi puoccâmpeiviruuđâ. Tun puávtáh finniđ puoccâmpeiviruuđâ, jis tun lah 16–67-ihásâš jiehke tuu puácuvuođâ tiet paste porgâđ.
Puoccâmpeiviruttâ máksoo táválávt ton maŋa, ko tun lah lamaš pyeccen 10 peivid. Jis tun lah irâtteijee, te tun puávtáh finniđ puoccâmpeiviruuđâ jo tolebáá.
Meid pargottem tai uáppuruuđâ finnee uáppee puáhtá finniđ puoccâmpeiviruuđâ.
Jis tun finniih puoccâmluámu ääigi päälhi, te Kela máksá puoccâmpeiviruuđâ tuu pargoadeleijei.
Uusâ puoccâmpeiviruuđâ 2 mánuppaje siste pargonavcâttesvuođâ älgimist.
Mon ennuv tun finniih puoccâmpeiviruuđâ?
Puoccâmpeiviruuđâ meeri meriduvvoo tuu ihepuáđui mield. Ihepuáđuh uáivildeh tuu puáđuid 12 mánuppoojij ääigist.
Jis tuáhtár kaavnât, ete tun lah pargonavcâttes ovdâmerkkân vyesimáánu 2024 rääjist, Kela rekinist puoccâmpeiviruuđâ mere toi puáđui mieldi, maid tun lah finnim 1.4.2023–31.3.2024.
Puoccâmpeiviruttâ lii ain ucceeb ko ihepuáđuh.
Rekinist rekinistempalvâlusâst, mon ennuv tun puávtáh finniđ puoccâmpeiviruuđâ (suomâkielân).
Tun puávtáh meid koijâdiđ lase palvâlemnumerist 020 692 204.
Mon kuhháá puoccâmpeiviruttâ máksoo?
Puoccâmpeiviruttâ máksoo enâmustáá suulân ive ääigi. Kela seelvât puoccâmpeiviruttâpaje ääigi, ete ličij-uv vajoditmist iše tuu puácuvuođâ tipšoost.
Jis tun lah pargee, te Kela pivdá tuu toimâttiđ pargotiervâsvuotâtuáhtár čäällim ciälkkámuš tuu pargonaavcâst já máhđulâšvuođâin juátkiđ pargostâd. Ciälkkámuš tarbâšuvvoo majemustáá talle, ko tun lah finnim puoccâmpeiviruuđâ 90 argâpeivid.
Pargotiervâsvuođâhuolâttâs puáhtá selvâttiđ tuu tile meid maŋeláá. Tooimât Kelan meid taas lohtâseijee ciälkkámušâid.
Lasepeeivih puoccâmpeiviruutân
Motomijn tábáhtusâin Kela puáhtá mieđettiđ lasepeeivijd puoccâmpeiviruutân.
Táválávt puoccâmpeiviruuđâ puáhtá finniđ enâmustáá suullân ive. Jis tun maacah paargon ton maŋa, mutâ kiävá-uv nuuvt, ete tuu puácuvuotâ iästá vala-uv porgâm, Kela puáhtá mäksiđ puoccâmpeiviruuđâ vala 50 peivid lase.
Lasepeeivij finnim váátá kuittâg tom, ete tun lah lamaš pargoost ohtânmaanoost 30 peivid ađai suulân mánuppaje ton maŋa, ko puoccâmpeiviruuđâ enâmusäigi lii nuuhâm.
Jis pargonavcâttesvuotâ juátkoo jiehke tun pyevti maccâđ paargon, Kela tai pargoiäláttâphlájádâs äššitobdeeh selvâtteh, ete puávtáh-uv tun pääcciđ pargonavcâttesvuotâiäláttâhân.