Pärnitipšo torjuuh vaanhimijriijâ maŋa | Anarâškielâ | KelaMoonâ siskáldâsân

Pärnitipšo torjuuh vaanhimijriijâ maŋa

Vaanhimijriijâ maŋa tâi vaanhimijruttâpoojij kooskâst tun puávtáh

  • finniđ päikkitipšo torjuu, jis pärni ij uásálist kieldâ arâšoddâdmân
  • finniđ päikkitipšo tâi priivaat tipšo torjuu, jis pärni uásálist priivaat arâšoddâdmân.

Tun puávtáh meid finniđ njyebžilis tipšoruuđâ, jis tun poorgah enâmustáá 30 tijmed ohhoost iäge tunjin maksuu vaanhimijpeiviruuđah. Pärnitipšo torjuuh  iä maksuu vuálá mánuppaje ääigist.

Päikkitipšotoorjâ

Päikkitipšotorjuu puáhtá uuccâđ, jis vuálá 3-ihásii päärni tipšoh eres ko kieldâ arâšoddâdmist, ovdâmerkkân pääihist. Tipšoo puáhtá leđe päärni vaanhim tâi kiinii eres, ovdâmerkkân ákku tâi äijih tâi pálkkááttum tipšoo.

Tun puávtáh finniđ päikkitipšotorjuu, ko päärni šoddâmist láá moonnâm 160 argâpeivid. Talle pärni lii suulân 6 mánuppaje ihásâš.

Päikkitipšotorjuu ij pyevti finniđ, jis pärni lii kieldâ arâšoddâdmist. Päikkitipšotorjui kuleh tipšoruttâ já tipšolase. Ton lasseen tuu päikkikieldâ puáhtá mäksiđ kieldâlase.

Tipšoruttâ lii

  • suulân 378 eurod mánuppaajeest oovtâ vuálá 3-ihásiist
  • suulân 113 eurod mánuppaajeest perruu jyehi eres vuálá 3-ihásii päärnist
  • suulân 73 eurod mánuppaajeest jyehi paijeel 3-ihásiist mutâ vuálá škovlâahasii päärnist.

Tipšolase finnee tuše oovtâ päärnist, já tot lii enâmustáá suulân 194 eurod mánuppaajeest. Tipšolase meeri meriduvvoo vaanhimij puáđui mield.

Motomeh kieldah mäksih päikkitipšo torjuu lasseen kieldâlase. Koijâd päikkikieldâst tâi Kelast, ete finniih-uv tun kieldâlase.

Päikkitipšotorjust piärroo viäru.

Priivaat tipšo toorjâ

Tun puávtáh finniđ priivaat tipšo torjuu, jis tuu päärni tipšo pálkkááttum tipšoo tâi priivaat arâšoddâdemsaje. Priivaat tipšo torjuu puáhtá finniđ, jis pärni lii tiävdám 9 mánuppaijeed, mutâ lii vuálá škovlâahasâš. Torjuu ij pyevti finniđ, jis pärni lii kieldâ arâšoddâdmist. Priivaat tipšo torjui kuleh tipšoruttâ já tipšolase. Ton lasseen tuu päikkikieldâ puáhtá mäksiđ kieldâlase.

Tipšoruttâ lii suulân 192 eurod mánuppaajeest. Jis pärni lii ovdâmáttááttâsavveest já uásiáigásávt arâšoddâdmist, te tipšoruttâ lii suullân 71 eurod mánuppaajeest.

Tipšoruuđâ lasseen tun puávtáh finniđ tipšolase. Tot lii suulân 266 eurod mánuppaajeest. Tipšolase meeri meriduvvoo puáđui mield. Jis tun finniih ucceeb tipšoruuđâ, te meid tipšolase lii ucceeb.

Kela máksá priivaat tipšo torjuu pálkkááttum tipšoi tâi arâšoddâdemsajan.

Priivaat tipšo torjust piärroo viäru.

Njyebžilis tipšoruttâ

Tun puávtáh finniđ njyebžilis tipšoruuđâ, jis tun poorgah enâmustáá 30 tijmed ohhoost já tipšoh eres ääigi tuu päärni. Kela máksá njyebžilis tipšomruuđâ vuálá 3-ihásii päärnist.

Njyebžilis tipšoruuđâ puáhtá mäksiđ kuohtuid vaanhimáid. Talle kuábáš-uv vaanhim kalga porgâđ uánihub pargoääigi ko táválávt. Suoi kolgâv tipšođ päärni sierâ ääigi tâi sierâ peeivi.

Njyebžilis tipšoruttâ máksoo pargoääigi mield. Tipšoruttâ puáhtá leđe jo-uv suullân 269 eurod mánuppaajeest tâi suulân 179 eurod mánuppaajeest tađe mield, mon ennuv tun koskâmiärálávt poorgah oho ääigi.

Kela máksá njyebžilis tipšoruuđâ siämmáá vaanhimân tuš oovtâ päärnist häävild.

Njyebžilis tipšoruuđâst piärroo viäru.

Uásitipšoruttâ

Tun puávtáh finniđ uásitipšoruuđâ, ko tun poorgah enâmustáá 30 tijmed ohhoost päärni tipšom tiet. Kela máksá uásitipšoruuđâ škoovlâst 1. já 2. luokkaast leijee päärnist. Uásitipšoruttâ lii suulân 108 eurod mánuppaajeest. Tast piärroo viäru.

Kela máksá uásitipšoruuđâ siämmáá vaanhimân häävild tuš oovtâ päärnist.

Siämmáá vaanhimân ij pyevti mäksiđ siämmáá ääigi uásitipšoruuđâ já njyebžilis tipšoruuđâ.

Sijđo lii peividum 11.2.2024

Mon mielâst tun lah sijđoost?