Divššo Kela-áššiid áiggil ortnegii ovdal juovllaid – basit váikkuhit doarjagiid máksimii
Kela-áššiid gánneha dikšut áiggil ortnegii ovdal juovllaid, dasgo basit váikkuhit ovdduid máksinbeivviide, ja jahkemolsašupmi lea Kelas hohpolaš áigi.
Áigáiboahtindoarjja geargá kontui ovdal juovllaid, juos ohcamuš ja mildosat leat doaimmahuvvon maŋimustá 12.12. Juovllat áradit maiddái bargguhisvuođaáigge almmuhan- ja máksinbeivviid.
Juovlabasiid ja ođđajagebeaivve Kela bálvalanbáikkit ja telefonbálvalus leat gitta. Lassin jahkemolsašupmi ja jagi vuosttas vahkut leat Kelas máŋgii hohpolaččat.
Oza áigáiboahtindoarjaga áiggil
Juovlamánus áigáiboahtindoarjaga maŋimuš máksinbeaivi ovdal juovllaid lea 23.12. Doarjja geargá dalle kontui, juos ohcamuš ja dárbbašlaš mildosat leat doaimmahuvvon Kelai maŋimustá 12.12.
Juos áššehas dárbbaša áigáiboahtindoarjaga hohpolaččat, son galgá váldit oktavuođa Kela bálvalanbáikái dahje bálvalannummirii 020 692 207. Hohpolaš dilli sáhttá leat ovdamearkan akuhta dárbu máksočatnasupmái dálkasiid dahje borramušgálvvuid várás.
Juos áššehas dárbbaša áigáiboahtindoarjaga hohpolaččat Kela rabasáiggiid olggobealde, gielda sáhttá vihkkedallama mielde mieđihit eastadeaddji áigáiboahtindoarjaga. Akuhta kriisadilis juovlabasiid áigge áššehas sáhttá leat oktavuođas iežas ássangieldda sosiálagohcimii.
Almmut bargguhisvuođabeivviid áiggil
Juovllat áradit bargguhisvuođaáigge almmuhan- ja máksinbeivviid. Oainnát OmaKelas dahje du oažžun almmuhanskovis beaivvi, goas sáhtát guođđit iežat almmuhusa.
Juos bargguhisvuođaáigge almmuhusa áigodat nohká 21.12.2022
- almmuhusa sáhtát máhcahit 21.12.2022
- ruđat leat konttus áramustá 23.12.2022.
Juos bargguhisvuođaáigge almmuhusa áigodat nohká 22.12.2022
- almmuhusa sáhtát máhcahit 22.12.2022
- ruđat leat konttus áramustá 27.12.2022.
Juos bargguhisvuođaáigge almmuhusa áigodat nohká 23.12., 24.12. dahje 25.12.2022
- almmuhusa sáhtát máhcahit 23.12.2022
- ruđat leat konttus áramustá 28.12.2022.
Almmuhusa gánneha doaimmahit áššedikšunbálvalusas juo máhcahanbeaivve iđida, vuoi dat gergo gieđahallot nu jođánit go vejolaš.
Telefonbálvalus lea rabas juovllaid ja ođđajagi gaskkas
Telefonbálvalus lea juovllaid ja ođđajage gaskasaš vahku áigge rabas maŋ–bea dmu 9–16. Bálvalanbáikkiid rabasáiggiin sáhttet leat nuppástusat juovllaid ja ođđajage gaskkas ja ođđajage maŋŋá. Rabasáiggiid ja čujuhusaid gánneha dárkkistit Suomi.fi-bálvalusas.
Anára bálvalanbáiki (Avvilis) lea rabas gaskavahkuid dmu 10–12 ja dmu 13–15.
Mii sávvat iežamet áššehasaide ráfálaš juovllaid ja lihkolaš ođđa jagi 2023!