Vuoigatvuohta Kela doarjagiidda olgoriikkain | Davvisámegiella | KelaMana sisdollui

Vuoigatvuohta Kela doarjagiidda olgoriikkain

Jos dus lea vuoigatvuohta Suoma sosiáladorvui, sáhtát dábálaččat oažžut seamma doarjagiid, maid oččošit Suomas. Olgoriikkaide sáhttá máksojuvvot ovdamearkka dihte mánáidruhta, etniiddoarjja ja eará mánnábearrašiid doarjagiid.

Buot Kela doarjagat eai goittotge máksojuvvo olgoriikkaide.

Ealáhagaid máksin olgoriikii

Jos oaččut ealáhaga ja fárret bissovaččat olgoriikkaide, Kela máksá dutnje álbmotealáhaga ja bearašealáhaga guhkimustá jagi áigge fárrema maŋŋá.

EU-riikkaide, Edg-riikkaide, Sveicii, Stuorra-Británniai dahje sosiáladorvosoahpamušriikkaide fárren olbmuide Kela máksá ealáhaga goittotge dábálaččat guhkit áigge.

Bargonávccahisvuođaealáhaga Kela máksá dušše EU-riikkaide, Edg-riikkaide ja Sveicii. Jos oaččut bargonávccahisvuođaealáhaga ja áiggut fárret olgoriikkaide, váldde oktavuođa Kelai ovdal go vuolggát. Kela čielggada, leago dus vuoigatvuohta ealáhahkii.

Dáhkádusealáhat ii máksojuvvo, jos fárret bissovaččat olgoriikkaide.

Bargoealáhagaid čoggomis ja máksimis olgoriikkaide oaččut lassidieđu Ealáhatdorvoguovddáža siidduin (www.etk.fi, suomagillii).

Ovttastuvvan stáhtaide studeret

Helssega universitehta studeanta Ville vuolgá molssastudeantan Ovttastuvvan Stáhtaide 9 mánotbaji áigái. Daningo Ville lea studeanta, sus lea vuoigatvuohta Kela doarjagiidda. Ollesáigásaš studeanta sáhttá oažžut Kela doarjagiid maiddái dalle, go studere badjel 6 mánotbaji olgoriikkain.

Matta-Afrihkái bargui

Elle fárre 5 mánotbadjái bargui Matta-Afrihkái. Su bearaš vuolgá su fárrui. Elles ja su bearrašis seailu vuoigatvuohta Kela doarjagiidda, go olgoriikkain ássan bistá vuollel 6 mánotbaji. Sis lea vuoigatvuohta daidda Kela doarjagiidda, maid sáhttit máksit olgoriikkaide. Olgoriikkaide eai máksojuvvo ovdamearkka dihte almmolaš ássandoarjja dahje mánáid ruoktodikšodoarjja.

Jos Elle bearaš fárrešii Matta-Afrihkái bissovaččat, vuoigatvuohta Suoma sosiáladorvui nogašii dalán, go sii fárrejit dohko.

Eurohpálaš buohccedikšunkoarta

Sáhtát diŋgot Kelas eurohpálaš buohccedikšunkoartta. Koarta lea nuvttá. Go dus lea koarta, oaččut buohccádettiin divššu EU-riikkas, Edg-riikkas, Sveiccas ja Stuorra-Británnias seamma hattiin go báikkálaš ássit.

Sáhtát diŋgot koartta neahtas. Neahtas sáhtát diŋgot koartta maiddái iežat mánnái.

Sáhtát diŋgot koartta maiddái bálvalannummiris 020 692 204.

Siidu beaiváduvvon 16.2.2024

Maid jurddašat siiddu birra?