Hååid Kela-aaʹššid ääiʹjbeäʹlnn ouddâl jooul – pââʹzz vaaikte tuärjjõõzzi mähssmõʹšše
Kela-aaʹššid kaʹnnat håiddad ääiʹjbeäʹlnn ouddâl jooul, ǥu pââʹzz vaaikte ouddõõzzi mähsspeeiʹvid, da eeʹjjvaajtõs lij Kelast ǩirrsaž äiʹǧǧ.
Piʹrǧǧeemtuärjjõs âstt tiʹlle ouddâl jooul, jõs ooccmõš da meâlddõõzz liâ tååimtum mââimõõzzâst 11.12. Jooul ääiʹjad še tuejteʹmesvuõttääiʹj iʹlmmtõs- da mähsspeeiʹvid. Jooul põõʹzzin da ođđeeʹjjpeiʹvven Kela kääzzkâʹsttempääiʹǩ da teʹlfonkääzzkõs liâ ǩidd. Lââʹssen eeʹjjvaajtõs da eeʹjj vuõssmõõzz neäʹttel liâ Kelast täujja ǩirrsa.
Vuäǯǯad piʹrǧǧeemtuärjjõõzz ääiʹjbeäʹlnn
Jooulmannust piʹrǧǧeemtuärjjõõzz mââimõs mähsspeiʹvv ouddâl jooul lij 22.12. Tuärjjõs âstt tâʹl tiʹlle, jõs ooccmõš da taarbšeei meâlddõõzz liâ tååimtum Kelaaʹje mââimõõzzâst 11.12.
Jõs äʹššneǩ taarbaš piʹrǧǧeemtuärjjõõzz ǩirrsânji, suʹst feʹrttai väʹldded õhttvuõđ Kela kääzzkâʹsttempäikka leʹbe kääzzkõsnââmra 020 692 207. Ǩirrsallaš vueʹǩǩ vuäitt leeʹd ouddmiârkkân akuutt tarbb mähssčõnnõõttâmpõʹmmja talkksi leʹbe poorrâmtarbbsi diõtt.
Jõs äʹššneǩ taarbaš piʹrǧǧeemtuärjjõõzz ǩirrsânji Kela äävaiåårramaaiʹji åålǥbeäʹlnn, kåʹdd vuäitt tuʹmmjõõzzes mieʹldd miõttâd cõggi piʹrǧǧeemtuärjjõõzz. Akuuttâst kriisvueʹjjest jooul põõʹzzi poodd äʹššneǩ vuäitt leeʹd õhttvuõđâst jälstemkååʹddes sosiaalpeiʹvvrõõttmõʹšše.
Iʹlmmet tuâjteʹmesvuõttpeeiʹvid ääiʹjbeäʹlnn
Jooul ääiʹjad tuejteʹmesvuõttääiʹj iʹlmmtõs- da mähsspeeiʹvid. Vuäinak OmaKelast leʹbe vuäǯǯmad iʹlmmtõslomaakkâst peeiʹv, kuäʹss vuäitak kueʹđđed jiijjad iʹlmmtõõzzad.
Jõs tuejteʹmesvuõttääiʹj iʹlmmtõõzz podd poott 20.12.2023 leʹbe 21.12.2023
- iʹlmmtõõzz vuäitt maaccted 20.12.2023
- tieʹǧǧ liâ tiillâst ääiʹjmõsân 22.12.2023.
Jõs tuejteʹmesvuõttääiʹj iʹlmmtõõzz podd poott 22.12.2023, 23.12.2023 leʹbe 24.12.2023
- iʹlmmtõõzz vuäitt maaccted 21.12.2023
- tieʹǧǧ liâ tiillâst ääiʹjmõsân 27.12.2023.
Jõs tuejteʹmesvuõttääiʹj iʹlmmtõõzz podd poott 25.12.2023
- iʹlmmtõõzz vuäitt maaccted 22.12.2023
- tieʹǧǧ liâ tiillâst ääiʹjmõsân 28.12.2023.
Iʹlmmtõs kaʹnnat tååimted OmaKelast juʹn maacctempeeiʹv tueʹlää, što tõt õõstât ǩiõttʼtõõllâd vueiʹtlva sõrgg.
Teʹlfonkääzzkõs lij äävai jooul da ođđeeʹjj kõskkarggpeeiʹvin
Lääʹddǩiõllsaž teʹlfonkääzzkõs lij jooul da ođđeeʹjj kõskksaž neäʹttlest äävai se–pi čiâss 9–16.
Nuõrttsääʹmǩiõllsaž teʹlfonkääzzkõs lij äävai aarǥi čiâss 9–11 nââmrest 020 634 4795. Kääzzkõs lij ǩidd kõskkpoddsânji 7.–11.12.2023 da 4.–5.1.2024. Vuäitak kueʹđđed õhttvuõttväʹlddemraukkmõõžž neʹttpooʹštin addrõʹsse saame@kela.fi. Kela sääʹmǩiõl siltteei veʹrǧǧooumaž leʹbe Kela jäʹrjstem tulkk soiʹttai tuʹnne, što suåppveʹted äʹššummšest.
Kääzzkâʹsttempaaiʹǩi äävaiåårramaaiʹjin vueiʹtte leeʹd muttâz jooul da ođđeeʹjj kõskkarggpeeiʹvin da ođđeeʹjj mâŋŋa. Äävaiåårramaaiʹjid da jååʹttemaddrõõzzid kaʹnnat taʹrǩsted kela.fist. Aanar kääzzkâʹsttempäiʹǩǩ (Âʹvvel) lij äävai seärad čiâss 10–12 da čiâss 13–15.
Tuäivtep äʹššniiʹǩǩid rääuhlõs jooul da leklvaž ođđ eeʹjj 2024!
Looǥǥ lââʹzz