Hååid Kela-aaʹššid ooudbeäʹlnn jooul – pââʹzz vaaikte mäʹhssempeeiʹvid
Jooul da eeʹjjvaajtõõzz pââʹzz poʹhtte muttsid Kela äʹššneǩ-kääzzkõõzz äävaiåårramaaiʹjid di ouddõõzzi ooccmõõžž da mähssmõõžž äiʹǧǧtaaulid. Âlddsin puk Kela-aaʹššid vuäitt håiddad MuuKelast.
Kela-äʹššummuž kaʹnnat håiddad juʹn ooudbeäʹlnn jooul, ǥu eeʹjjvaajtõs lij Kelast ǩirrsaž äiʹǧǧ da põõʹzzi poodd kääzzkõspääiʹǩ di teʹlfonkääzzkõs liâ ǩidd. Ođđeeʹjjpeiʹvvkäänan lääʹddǩiõllsaž äʹššneǩ-kääzzkõs lij äävai čiâss 13 räjja da piʹrǧǧeemtuärjjõõzz peiʹvvrõõttmõš čiâss 16 räjja. Jooul diõtt reâuǥteʹmesvuõtt-tuärjjõõzz iʹlmmtõs- da mäʹhssempeeiʹv lie ääiʹjab. Jooulmannu piʹrǧǧeemtuärjjõs âstt baŋkktiʹlle ooudbeäʹlnn jooul, jos ooccmõš da taarbšum meâlddõõzz lie tååimtum mââimõssân 10.12.2025.
Njueʹbǯǯlõs nääʹll håiddad Kela-aaʹššid lij MuuKelast, koʹst vuäitt ooccâd, tååimted meâlddõõzzid di tääʹrǩsted ooccmõõžži vueʹjj da mäʹhssempeeiʹvid.
Äʹššneǩ-kääzzkõs lij ǩidd põõʹzzi poodd – ođđeeʹjjkäänan rajjtum äävaiåårrmõš
Kela teʹlfonkääzzkõs da kääzzkõspääiʹǩ lie ǩidd jooul poodd 24.–26.12., ođđeeʹjjpeeiʹv 1.1. di veeʹrest 6.1.
Ođđeeʹjjkäänan 31.12. lääʹddǩiõllsaž teʹlfonkääzzkõs kääzzkâstt čiâss 9–13 da piʹrǧǧeemtuärjjõõzz teʹlfonkääzzkõs čiâss 16 räjja. Lääʹddǩiõllsa kääzzkõsnââmar käunnʼje addrõõzzâst www.kela.fi/soita-kelaan (lääddas).
Sääʹmǩiõllsaž äʹššneǩ-kääzzkõʹsse vuäitak kueʹđđed õhttvuõttväʹlddemraukkmõõžž addrõʹsse saame@kela.fi. Lââʹssteâđ sääʹmǩiõllsa äävaiåårramaaiʹjin jooul da eeʹjjvaajtõõzz poodd kaaunak Kela sääʹmǩiõllsaž neʹttseeidain.
Vueʹss kääzzkõspaaiʹǩin kääzzkâstt ǩirrsallaž piʹrǧǧeemtuärjjõsvuõʹjjin čiâss 16 räjja. Muđoi kääzzkõspääiʹǩ mâʹnne ǩidd mââimõõzzâst čiâss 13. Puki kääzzkõspaaiʹǩi äävaiåårramaaiʹjid da addrõõzzid vuäitak tääʹrǩsted addrõõzzâst www.kela.fi/palvelupisteet (lääddas).
Kääzzkõspääiʹǩ lie äävai 31.12. čiâss 16 räjja puõʹtti päiʹǩǩ-kooʹddin: Heʹlssen (Kamppi), Joensuu, Jyväskylä, Kajaani, Kuopio, Lahti, Lappeenranta, Oulu, Tampere, Turku da Vaasa.
Lääʹmes oummui tuʹlǩǩõskääzzkõõzz jooul da eeʹjjvaajtõõzz äävaiåårramääiʹj käunnʼje addrõõzzâst www.kela.fi/vammaisten-tulkkauspalvelu-yhteystiedot (lääddas).
Reâuǥteʹmesvuõttpeeiʹvi iʹlmmtõõttmõš da mäʹhssempeeiʹv mottje
Jooul ääiʹjad reâuǥteʹmesvuõttääiʹj iʹlmmtempeeiʹvid da reâuǥteʹmesvuõtt-tuärjjõõzz mäʹhssempeeiʹvid. Vuäinak MuuKelast leʹbe vuäǯǯmad iʹlmmtõslomaakkâst peeiʹv, täʹl vuäitak kueʹđđed jiijjad iʹlmmtõõzzad.
Jõs reâuǥteʹmesvuõttääiʹj iʹlmmtem pââʹjj poott 19.–23.12.2025
- iʹlmmtõõzz vuäitt maaccted 19.12.2025.
- tieʹǧǧ lie tiil âʹlnn ääiʹjmõssân 23.12.2025
Jos reâuǥteʹmesvuõttääiʹj iʹlmmtem pââʹjj poott 24.12.2025
- iʹlmmtõõzz vuäitt maaccted 22.12.2025.
- tieʹǧǧ lie tiil âʹlnn ääiʹjmõssân 29.12.2025
Jos reâuǥteʹmesvuõttääiʹj iʹlmmtem pââʹjj poott 25.12.2025
- iʹlmmtõõzz vuäitt maaccted 23.12.2025.
- tieʹǧǧ lie tiil âʹlnn ääiʹjmõssân 30.12.2025
Iʹlmmtõõzz kaʹnnat tååimted MuuKelast juʹn maacctempeeiʹv tueʹlää, što tõn õõstât ǩiõttʼtõõllâd sõõrǥmõõzz mieʹldd.
Ooʒʒ piʹrǧǧeemtuärjjõõzz ääiʹjeld
Piʹrǧǧeemtuärjjõõzz mââimõs mäʹhssempeiʹvv ooudbeäʹlnn jooul lij 23.12.2025. Tuärjjõs ǩiõrggan baŋkktiʹlle ooudbeäʹlnn jooul, jos ooccmõš da taarbšum meâlddõõzz lie tååimtum mââimõssân 10.12.2025.
Ǩirrsallaš vuõʹjjin, mâʹte krootai šõddâm taarbâst vuäǯǯad mähssčõnnõõttmõš talkksid leʹbe porrmõʹšše, vuäitak väʹldded õhttvuõđ Kela kääzzkõsnââmra 020 692 207 (lääʹddǩiõʹlle) leʹbe äʹššeed kääzzkõspääiʹǩest.
Kela äävaiåårramaaiʹji åålǥbeäʹlnn ǩirrsallaš vuõʹjjin vuäitt leeʹd õhttvuõđâst pueʹrrvââjjamvuuʹd sosiaalkääzzkõʹsse, kååʹtt vuäitt tuʹmmjõõzz mieʹldd miõttâd cõggi piʹrǧǧeemtuärjjõõzz. Krootai šõddâm kriisvueʹjjest jooulpõõʹzzi ääiʹj äʹššneǩ vuäitt leeʹd õhttvuõđâst pueʹrrvââjjamvuuʹd sosiaalpeiʹvvrõõttmõʹšše. Õhttvuõđteâđaid vuäitak tääʹrǩsted Suomi.fi-kääzzkõõzzâst ooʒʒeeʹl sosiaal- da kriispeiʹvvrõõttâm addrõõzzâst www.suomi.fi/kartta (lääddas).
Muttâz tuärjjõõzzid eeʹjjest 2026
Määŋgaid Kela mähssmid tuärjjõõzzid lie pueʹttmen muttâz eeʹjj 2026 aalǥâst. Vueʹss muttsin lie juʹn primmum eeʹttiǩ-kååʹddest, vueʹzz lie veâl ǩiõttʼtõõllâm vueʹlnn. Ääiʹjtässʼsaž teâđ meäʹrin da määinain käunnʼje addrõõzzâst www.kela.fi/muutokset (lääddas). Noorrâp muttsid še sääʹmǩiõllsaž teâđtõʹsse, koon õlmstâʹttep eeʹjjvaajtõõzz poodd.
Piiđkoort ij taarbâž tååimted Kelaaʹje
Kela vuäǯǯ eeʹjj 2026 ouddpiiđväʹlddemteâđaid vuõiʹǧǧest Piiđvaaldšmest, nääiʹt piiđkoort ij taarbâž vuõltteed Kelaaʹje. Jõs haaʹlad muʹtted piiđproseeʹnt, vuäitt ođđ piiđkoort tiʹllʼjed OmaVerost.
Tuäivtep äʹššneeʹǩǩeen šiõǥǥ jooul poodd da leklvaž ođđ eeʹjj 2026!
Looǥǥ lââʹzz