Ålggjânnmin vuõǯǯum puõccihååidast vuäitt ååʹn vuäǯǯad ääiʹjbu šuurab koʹrvvõõzz
Muttâz läkka raajid râstldeei tiõrvâsvuõtthuâlast puõʹtte viõʹǩǩe mââiǩiõʹtte. Koʹrvvõõzz vuäitt ooccâd tõin jiõččtååimlaž hoiddu ooʒʒõõttmõõžž kuulin, kook liâ šõddâm EU- leʹbe Eta-jânnmest, Sveiʹccjânnmest, Jõnn-Britanniast leʹbe Tâʹvv-Irlaantâst 1.1.2023 leʹbe tõn mâŋŋa. Koʹrvvõõzz määuʹset jäänmõsân tõn veeʹrd, mâid vaʹstteei håidd leʹčči mähssam äʹššneeʹǩǩ jiijjâs pueʹrrvââjjamvuuʹdest Lääʹddjânnmest.
Äʹššneǩ vuäitt ooʒʒõõttâd puõccihoiddu nuuʹbb EU- leʹbe Eta-jânnma, Sveiʹccjânnma, Jõnn-Britanniaaʹje leʹbe Tâʹvv-Irlaʹntte da vuäǯǯad Kelast koʹrvvõõzz hååid kuulin. Hoiddu vuäitt ooʒʒõõttâd jiõččtååimeeʹl leʹbe raukkâd hoiddu ooʒʒõõttmõõžž diõtt ouddlååʹv Kelast.
Lääʹǩǩ raajid râstldeei tiõrvâsvuõtthuâlast mõttji 1.5.2023. Juätkast Kela koʹrvvad jiõččtååimlaž hoiddu ooʒʒõõttmõõžž kuulid jäänmõsân tõn veeʹrd, mõõn vaʹstteei håidd leʹčči mähssam äʹššneeʹǩǩ jiijjâs pueʹrrvââjjamvuuʹdest Lääʹddjânnmest. Kela kââčč taarbšeei teâđaid äʹššneeʹǩǩ pueʹrrvââjjamvuuʹd tiõrvâsvuõtthuâlast. Kooi-ne vuõʹjjin muuttâs vuäitt miârkted tõn, što Kela mähss äʹššnekka ääiʹjbu šuurab koʹrvvõõzz. Muttâz puõʹtte viõʹǩǩe mââiǩiõʹtte 1.1.2023 ääʹljeeʹl, leʹbe koʹrvvõõzz vuäitt ooccâd tõin kuulin, kook liâ šõddâm 1.1.2023 leʹbe tõn mâŋŋa.
Hååid feʹrttai vaʹstteed Lääʹddjânnmest uʹvddem hååid
Ǥu äʹššneǩ ooʒʒââtt jiõččtååimeeʹl hoiddu nuuʹbb EU- leʹbe Eta-jânnma, Sveiʹccjânnma, Jõnn-Britanniaaʹje leʹbe Tâʹvv-Irlaʹntte, suʹst feʹrttai ooccâd suåppi håiddpäiʹǩǩ jiõčč da seʹlvvted, vuäitt-a vuäǯǯad toʹben hååid.
Koʹrvvõõzz õõudldõssân lij, što håidd lij ärvvtõllum taalkâstiõđlânji taarbliʹžžen. Hååid feʹrttai še vaʹstteed hååid, koon äʹššneǩ leʹčči vuäǯǯam Lääʹdd õõlmâs tiõrvâsvuõtthuâlast. Lââʹssen hoiddu taarbšet vuõlttõs, jõs vuõlttõs taarbšeʹčeš vaʹstteei hoiddu Lääʹddjânnmest.
Äʹššneeʹǩǩest feʹrttai mäʹhssed vuõššân puk håiddkuuleez jiõčč da raukkâd koʹrvvõõzz mââibeäʹlnn 6 määnpââʹj määʹttest tõʹst, ǥu son lij mähssam hååid.
Koʹrvvõõzz ooʒʒât lomaakkin Ulkomailla syntyneet sairaanhoitokustannukset - Ålggjânnmest šõddâm puõccihåiddkuul SV 128 (pdf, lääddas).
Äʹššneǩ vuäitt raukkâd teâđ koʹrvvõõzz meäʹrest ooudbeäʹlnn
Äʹššneǩ vuäitt raukkâd Kelast ooudbeäʹlnn teâđ, vuäǯǯ-a son ålggjânnmest uʹvddem hååidast koʹrvvõõzz da mii koʹrvvõõzz mieʹrr lij. Tän teâđ kååččat ouddiʹlmmtõssân. Kela mähss koʹrvvõõzz iʹlmmtõõzzâst iʹlmmtem naaʹlin, jõs håidd lij čõõđtum äʹššneeʹǩǩ ooccmõõžžâst uʹvddmi teâđai meâldlânji.
Ouddiʹlmmtõõzzid ooʒʒât lomaakkin Hakemus - Ennakkoilmoitus ulkomailla annettavan sairaanhoidon korvauksesta (kela.fi, lääddas).
Eeʹjj 2024 aalǥâst koʹrvvõõzz vuäǯǯmõš vuäitt õudlded ouddlååʹv
Lääʹǩǩmuttâz seuʹrrjõssân eeʹjj 2024 aalǥâst vääʹldet âânnma ođđ puõccidirektiiv meâldlaž ouddlååʹpp.
Kooi-ne vuõʹjjin ouddlååʹpp lij õõudldõs tõõzz, što Kela vuäitt mäʹhssed äʹššnekka koʹrvvõõzz ålggjânnmest vuõǯǯum hååidast. Ouddlååʹpp puätt åårrad pääkklaž ouddmiârkkân tâʹl, jõs hoiddu õhttan jiijjâsnallšem riskk da tõt õõudald instummuž puõccipõõrtâst.