Viärjukenigâs torjuuh | Anarâškielâ | KelaMoonâ siskáldâsân

Viärjukenigâs torjuuh

Viärjukenigâsvuođâ čođâldittem uáivild suátiviehân tâi siiviilpalvâlusân moonnâm.

Suátivievâst tâi siiviilpalvâlusâst orroo finnee suu palvâlemsaajeest uccâ peiviruuđâ.

Toos lasseen Kela puáhtá mäksiđ suáldáttorjuu. Tom puáhtá mäksiđ suátivievâst tâi siiviilpalvâlusâst orroi tâi suu omâháid. Omâhâš uáivild viärjukenigâs pelikyeimi tâi ávuskyeimi, kiäin viärjukenigâsâst lii ohtâsâš pärni. Toos lasseen omâhááh láá viärjukenigâs jieijâs päärnih já pelikyeimi päärnih.

Kela puáhtá mäksiđ suáldáttorjuu meid ulmui, kii puátá olgoenâmijn Suomân palvâlusân.

Suáldáttorjui kuleh

  • vuáđutoorjâ
  • aassâmtoorjâ
  • elettemtoorjâ
  • sierânâstoorjâ.

Lasseen Kela puáhtá mäksiđ uáppuloovnâ riäntuid.

Suáldáttorjuu puáhtá finniđ

  • viärjukenigâs
  • pelikyeimi
  • ávuskyeimi, jis kuoimijn lii ohtsâš pärni
  • viärjukenigâs jieijâs pärni tâi pelikyeimi pärni.

Luuvâ lase suáldáttorjuu ucâmis (suomâkielân).

Puáđui vaikuttâs suáldáttorjui

Suáldáttorjui miärán vaigutteh puáđuh, maid viärjukenigâs já suu omâhááh finnejeh palvâlusääigi. Puáđuh váldojeh huámmášumán nettomeerrin ađai viärui kepidem maŋa. Torjuu meeri kiäppán nettopuáđuid västideijee summáin.

Viärjukenigâs pälkki- já irâttâspuáđuin lii kuittâg 300 euro syejiuási. Syejiuási uáivild sume, mon palvâlusâst orroo puáhtá tiänáđ mánuppaajeest tienuuvt, ete tot ij vaaigut suáldáttorjuu miärán.

Vuáđutoorjâ

Kela puáhtá mäksiđ viärjukenigâs omâhâžân vuáđutorjuu. Vuáđutoorjâ luávdá kyeimi já paarnij jyehipiäiválijd koloid, mooid eres puáđuh iä pijssáá. Toh láá ovdâmerkkân purrâmušân, pihtâsáid já tiervâsvuođâtiipšon lohtâseijee koloh.

Ive 2023 vuáđutorjuu oles meeri lii 733 eurod mánuppaajeest. ​​​​​Torjuu miärán vaigutteh perruu puáđuh já paarnij meeri.

Aassâmtoorjâ

Kela puáhtá mäksiđ viärjukenigâs já suu omâháá kuáhtulijd aassâmkoloid.

Kela puáhtá mieđettiđ aassâmtorjuu viärjukenigâsân olssis tuše, jis sun lii aassâm jiečânávt suulân 3 mánuppaje ovdil palvâlus. Aassâmkoloid rekinistojeh láigu, čäci- já šleđgâmáávsuh, táluservimáksu, aassâmloovnâ riäntuh sehe peerâtáálu tipšomkoloh.

Elettemtoorjâ

Jis viärjukenigâs ij paste mäksiđ páárnán elettemiše, te Kela puáhtá mäksiđ elettemtorjuu suátivievâ tâi siiviilpalvâlus ääigi.

Sierânâstoorjâ já uáppuloovnâ riäntuh

Kela puáhtá mäksiđ viärjukenigâs omâhâžân ovdâmerkkân tiervâsvuođâtiipšon tâi pärnitiipšon lohtâseijee koloid. Taat nabdoo sierânâstoorjân. Kela puáhtá meid mäksiđ viärjukenigâs já suu omâháá uáppuloovnâ riäntuid.

Eres torjuuh

Jis viärjukenigâs lii vaanhimijriijâst, te sun puáhtá finniđ vaanhimijpeiviruuđâid.

Jis tun jieh pyevti finniđ suáldáttorjuu, tust puáhtá leđe vuoigâdvuotâ finniđ almos aassâmtorjuu. Täärhist ääši Kelast.

Sijđo lii peividum 21.6.2023

Mon mielâst tun lah sijđoost?