Vearjogeatnegasa doarjagat
Vearjogeatnegasvuođa čađaheapmi oaivvilda dan, ahte olmmoš manná soahtevehkii dahje siviilabálvalussii.
Vearjogeatnegasa dahje siviilabálvalusa čađaheaddji oažžu iežas bálvalanbáikkis unna beaiveruđa.
Lassin Kela sáhttá máksit soalddátdoarjaga. Dat sáhttá máksojuvvot olbmui, gii lea soahteveagas dahje siviilabálvalusas dahje su oapmahaččaide. Oapmahaš dárkkuha vearjogeatnegasa náittosguoimmi ja ovttasorru, geainna vearjogeatnegasas lea oktasaš mánná. Lassin oapmahaččat leat vearjogeatnegasa mánát ja náittosguoimmi mánát.
Kela sáhttá máksit soalddátdoarjaga maiddái dakkár olbmui, gii boahtá olgoriikkain Supmii bálvalussii.
Soalddátdoarjagii gullet
- vuođđodoarjja
- ássandoarjja
- ealihandoarjja
- sierradoarjja.
Lassin Kela sáhttá máksit oahppoloana reanttuid.
Soalddátdoarjaga sáhttet oažžut
- vearjogeatnegas
- náittosguoibmi
- ovttasorru, jos beallelaččain lea oktasaš mánná
- vearjogeatnegasa mánná dahje náittosguoimmi mánná.
Loga lasi soalddátdoarjaga ohcamis (suomagillii).
Boađuid váikkuhus soalddátdoarjagii
Soalddátdoarjaga mearrái váikkuhit boađut, mat vearjogeatnegas dahje su oapmahaččat ožžot bálvalusa áiggis. Boađut váldojuvvojit vuhtii nettomearálažžan nappo vearuid maŋŋá. Doarjaga mearri unnu nettoboađuid vástideaddji supmiin.
Vearjogeatnegasa bálká- ja fitnodatdoalli boađuin lea goittotge 300 euro suodjeoassi. Suodjeoassi oaivvilda dan supmi, man bálvalusas lean olmmoš sáhttá dinet mánotbajis ovdal, go dat váikkuha soalddátdoarjaga mearrái.
Vuođđodoarjja
Kela sáhttá máksit vearjogeatnegasa oapmahažžii vuođđodoarjaga. Vuođđodoarjja gokčá beallelačča ja máná beaivválaš goluid, maidda eará boađut eai reahkká. Dat leat ovdamearkka dihte borramuššii, biktasiidda ja dearvvasvuođafuolahussii laktáseaddji golut.
Jagis 2023 vuođđodoarjaga dievas mearri lea 733 euro mánotbajis. Doarjaga mearrái váikkuhit bearraša boađut ja mánnálohku.
Ássandoarjja
Kela sáhttá máksit vearjogeatnegasa ja su oapmahaččaid govttolaš ássangoluid.
Kela sáhttá mieđihit ássandoarjaga vearjogeatnegassii dušše dalle, juos son lea ássan iehčanassii sulaid 3 mánotbaji áigge ovdal bálvalusa. Ássangoluide rehkenastojuvvojit láigu, čáhcemávssut, šleađgamávssut, vástta, visteloana reanttut ja bearašviesu dikšungolut.
Ealihandoarjja
Jos vearjogeatnegas ii bastte máksit mánnái ealihanveahki, Kela sáhttá máksit ealihandoarjaga soahteveaga dahje siviilabálvalusa áigge.
Sierradoarjja ja oahppoloana reanttut
Kela sáhttá máksit vearjogeatnegasa oapmahažžii ovdamearkka dihte dearvvasvuođafuolahussii dahje mánáiddikšumii laktáseaddji goluid. Dat gohččoduvvojit sierradoarjjan. Kela sáhttá maiddái máksit vearjogeatnegasa ja su oapmahačča oahppoloana reanttuid.
Eará doarjagat
Jos vearjogeatnegas lea vánhemiidluomus, son sáhttá oažžut vánhemiidruđaid.
Jos it sáhte oažžut soalddátdoarjaga, dus sáhttá leat vuoigatvuohta almmolaš ássandoarjagii. Dárkkis ášši Kelas.