Ná ozat ealáhaga
Oza ealáhagaid ja eará doarjagiid neahta bokte.
Dárkkis ohcamušas, mat čuvvosat das galget leat. Maiddái čuvvosiid sáhttá sáddet neahta bokte.
Don sáhtát ohcat ealáhaga dahje doarjaga maiddái skoviin, man oaččut Kela doaimmahagain ja neahttasiidduin.
Kela poastačujuhus lea
Kela
PL 10
00056 KELA
Mánnábajádusa, leaskkaealáhaga ja mánáealáhaga sáhtát ohcat Kelas dušše skoviin. Sáhtát sáddet poastta fárus skovi Kelai dahje váldit das gova ja sáddet dan MuKela bokte.
Ealáhatohcamuša sáhtát doaimmahit maiddái man beare ealáhatlágádussii.
Kela boarisvuođaealáhaga ja dáhkádusealáhaga sáhtát ohcat maiddái telefovnna bokte dahje njálmmálaččat Kela doaimmahagas.
Oza boarisvuođaealáhaga moadde mánotbaji ovdal go leat báhcimin ealáhahkii.
Kela sáhttá máksit ealáhagaid maŋálgihtii eanemustá 6 mánotbaji áiggis.
Go Kela lea gieđahallan du ohcamuša, oaččut mearrádusa MuKelai. Oaččut mearrádusa maiddái ruoktot, jos it leat luohpan báberpoasttas. Mearrádusas muitaluvvo ealáhaga dahje doarjaga mearis, vuođustusain ja máksinbeaivvis. Oaččut mearrádusa maiddái dalle, jos dutnje ii leat mieđihuvvon ealáhat dahje doarjja.
Oza ealáhaga maiddái olgoriikka barggus
Olgoriikkain ássan ja bargan sáhttet váikkuhit álbmotealáhahkii ja bearašealáhahkii. Jos leat ássan dahje bargan olgoriikkain, sáhtát oažžut ealáhaga barganriikkas. Leaska sáhttá oažžut bearašealáhaga riikkas, gos beallelaš lea bargan.
Dihto olgoriikka ealáhagaid sáhttá ohcat seamma skoviin go Suoma ealáhagaid.
Muitte deavdit ja laktit ohcamuššii maiddái U-mielddusskovi, man namma lea Mielddus U - Ássan ja bargan olgoriikkain (pdf). Dat dárbbašuvvo ealáhatohcamuša mielddusin álo, jos leat ássan, bargan dahje stuđeren olgoriikkain.
Sáhtát bivdit árvvoštallama ealáhagas ovddalgihtii
Jos háliidat čielggadit ovddalgihtii, sáhtátgo oažžut álbmotealáhaga, sáhtát bivdit árvvoštallama Kelas.
Oaččut árvvoštallama maiddái das, sáhtátgo oažžut dáhkádusealáhaga.
Kela oažžu du bargoealáhatlágádusas dieđu das, man olu dutnje lea čoggon bargoealáhat.