Sisačáliheapmi MuKelai

Báŋkkut mieđihit persovnnalaš neahttabáŋkodovddaldagaid iežaset njuolggadusaid mielde. Sierra báŋkkuin leat maiddái iešguđetlágan identitehta sihkkarastinvuogit, ovdamearkka dihtii heivehusat ja čoavddadovddaldatkoarttat. Váldde oktavuođa iežat báŋkui jus dus leat jearaldagat neahttabáŋkodovddaldagain.

1. Vállje kela.fi-siiddu badjeravddas Čálit sisa – Persovdnaáššehasat (Kirjaudu – Henkilöasiakkaat).
2. Vállje sihkkarastinsiiddus iežat báŋkku.
3. Vállje mainna vugiin áiggot duođaštit iežat identitehta, omd. heivehus dahje čoavddadovddaldatkoarta, ja duođaš iežat identitehta bálvalusas.
4. Go duođaštus lihkosmuvvá, sirdašuvat automáhtalaččat MuKelai.

Mobiilasihkkarastin lea identitehtaduođašteami vuohki, mii doaibmá mátketelefoniin. Sáhtát váldit dan adnui jus dus lea mátketelefon ja sihkkarastimii heivvolaš SIM-koarta. Váldde mobiilasihkkarastima adnui neahtas, telefoniin dahje fina iežat operáhtora buvddas.
Fuomáš, ahte mobiilasihkkarastin soaitá máksit. Dárkkis iežat operáhtoris (omd. Telia, Sonera dahje DNA). Kela ii váldde mávssu geavaheamis. Loga lasi mobiilasihkkarastimis.

1. Vállje kela.fi -siiddu badjeravddas Čálit sisa – Persovdnaáššehasat (Kirjaudu – Henkilöasiakkaat).
2. Vállje sihkkarastinsiiddus mobiilivarmenne (mobiilasihkkarastin).
3. Deavdde iežat telefonnummira.
4. Oaččut telefonii sihkkarastinbivdaga Kelas. Deaddil OK. Du telefonii ihtá rukta, masa deavddát PIN-koda, man leat addán mobiilasihkkarastimii.
5. Go sihkkarastin lihkosmuvvá, sirdašuvat automáhtalaččat MuKelai.

Persovdnakoartta sáhttá geavahit identitehta duođašteapmái, jus das lea álbmotsihkkarastin ja sihkkarastin lea aktiverejuvvon. Persovdnakoartta, mas lea čiekka, galgá ohcat polesis.

Persovdnakoartta lassin dárbbašat

• dihtora
• koartalohkki
• koartalohkanprográmma
• persovnnalaš dovddaldagaid

Loga lasi álbmotsihkkarastimis (dvv.fi, suomagillii).