Ǩieʹss põhtt muttsid Kela kääzzkõspaaiʹǩi äävaiåårramaaiʹjid
Ǩeässa še Kela aaʹššid kaʹnnat håiddad OmaKelast leʹbe soiʹttjeeʹl teʹlfonkääzzkõʹsse. Määŋgain Kela kääzzkõspaaiʹǩin äävaiåårramääiʹj mõttje ǩieʹzz ääiǥas, da ođđ äävaiåårramaaiʹjid seeʹrdet 29.5.2023 ääʹljeeʹl.
Vuäitak håiddad määŋgaid Kela aaʹššid neeʹttest: ooccâd ouddõõzzid, tääʹrǩsted tuʹmmstõõǥǥ, ǩiõččâd kuäʹss ouddõõzz määuʹset, tååimted meâlddõõzzid da vuõltteed Kelaaʹje saaǥǥid. Kela neʹttseeidain chatrobott vuäʹppast piʹrǧǧeemtuärjjõʹsse, takai jälstemtuärjjõʹsse, mättʼtõõđji tuärjjõõzzid di piârouddõõzzid kuõskki aaʹššin. Kela kääzzkâstt äʹššniiʹǩǩid še Facebook da Instagraam pääiʹǩ.
Jõs jiijjad äšša ij kaunnu vasttõs neeʹttest, vuäitak soiʹttjed Kela teʹlfonkääzzkõʹsse. Teʹlfonkääzzkõs lij še ǩeässa äävai vuõssaarǥâst piâtnca čiâss 9–16. Teʹlfoonâst vuäitak håiddad seämma persoonlaž aaʹššid ǥu kääzzkõspääiʹǩest. Kääzzkõsnââmar liâ jeäʹrdõllum jieʹllemvueʹjji mieʹldd. Jõs jiõk kaaun suåppi nââmar, vuäitak soiʹttjed koozz täättas nââmra.
Teʹlfonkääzzkõʹsse vuäitak še vaʹrrjed ääiʹj, täʹl Kelast soiʹttjet äʹššnekka. Teʹlfonääiʹj vuäitt vaʹrrjed neeʹttest leʹbe soiʹttjeeʹl koozz täättas kääzzkõsnââmra.
Sääʹmǩiõllsaž kääzzkõõzz ǩieʹsspââʹjest
Kela tâʹvvsääʹmǩiõllsaž teʹlfon- da ougglõskääzzkõs lij äävai ǩieʹzz poodd arggpeeiʹvin čiâss 9–11 nââmrest 020 634 2894. Kela nuõrttsääʹmǩiõllsaž teʹlfon- da ougglõskääzzkõs lij äävai čiâss 9–11 nââmrest 020 634 4795 (ǩidd 10.7.–4.8.). Sääʹmǩiõllsaž äʹššneeʹǩǩ vueiʹtte kueʹđđed še õhttvuõttväʹlddemraukkmõõžž neʹttpååʹšt mieʹldd addrõʹsse saame@kela.fi. Aanarsääʹmǩiõʹlle kääzzkõõzz vuäǯǯ tuulk veäkka. Kaaunak lââʹssteâđaid Kela sääʹmǩiõllsaž kääzzkõõzzin addrõõzzâst kela.fi/saame.
Kääzzkõspaaiʹǩi äävaiåårramaaiʹjin muttâz 29.5.2023 ääʹljeeʹl
Määŋgain Kela kääzzkõspaaiʹǩin äävaiåårramääiʹj mõttje ǩieʹzz ääiǥas. Ǩieʹssäävaiåårramäiʹǧǧ puätt viõʹǩǩe 29.5.2023 ääʹljeeʹl da põõtt mââimõõzzâst 30.9.2023.
Šuurab gåårdi kõõskõõzzin toiʹmmjeei kääzzkõspääiʹǩ liâ äävai takainalla leʹbe âlddsin takainalla. Uuʹccab kääzzkõspaaiʹǩi beäʹlnn muttâz liâ jeäʹnab. Kääzzkõspääiʹǩ äävaiåårramteâđ kaʹnnte tääʹrǩsted suomi.fist.
Mäʹhtt hååidam Kela-aaʹššid, jõs tõt ij ooʹnnest neeʹttest di ij ni teʹlfoonâst da ââldmõs kääzzkõspäiʹǩǩ lij ǩidd?
Määŋg päiʹǩǩ-kååʹddest lij veʹrǧǧniiʹǩǩi õhttsaž äʹššeempäiʹǩǩ, koʹst vuäʹpstet takai tääʹzzest Kela-aaʹššin. Kela-aaʹššin vuäǯǯ vuäʹpstõõzz še ouddmiârkkân Ohjaamoin, Âʹlddtoorin da kääzzkâʹsttemkõõskõõzzin. Lââʹssen määŋgain päiʹǩǩ-kååʹddin lij Kela ougglõskääzzkõs, leʹbe teâttmašina, koon pääiʹǩ vuäǯǯak Kela äʹšštobddja vueiʹnnem- da jiõnnõhttvuõđ. Ougglõskääzzkõs vaʹsttad kääzzkõõzz Kela jiijjâs kääzzkõspääiʹǩest. Vuäitak tääʹrǩsted suomi.fist, koʹst lij ââldmõs päiʹǩǩ, koʹst vuäǯǯ Kela ougglõskääzzkõõzz.
Vuäitak še väʹldded õhttvuõđ dommkååʹdd sosiaalkääzzkõõzzid, lääʹmeskääzzkõõzzid leʹbe tiõrvâsvuõđhuõllu, koʹst tuu vueiʹtet vieʹǩǩted ouddmiârkkân teʹlfonääiʹj vaʹrrjummšest. Ǥu tuʹnne vaʹrrjet teʹlfonääiʹj, Kela äʹšštobddi soiʹttai tuʹnne suåppum ääiʹjpoddân, ij-ǥa teʹlfonsaakk määuʹs ni mâid.
Põʹmmaipååʹšt kaʹnnat vuõltteet Kelaaʹje addrõʹsse Kela, PL 10, 00056 Kela.
Kääzzkõspaaiʹǩi äävaiåårramääiʹj 29.5.2023 ääʹljeeʹl (lääddas)