Aanar da Suäʹđjel kääzzkõspaaiʹǩi äävaiåårramääiʹj mottje
Äävaiåårramäiʹǧǧ mottai Kela kääzzkõspaaiʹǩin Aanrest da Suäʹđjlest 1.5.2024 ääʹljeeʹl.
Vueʹssmannust ääʹljeeʹl Kela kääzzkõspääiʹǩest Aanrest vuäǯǯ muâttšeeʹli vuäʹpstummuž äiʹǧǧvaʹrrjemtaa seärdi čiâss 10–12. Aanar kääzzkõspäiʹǩǩ lij Âʹvvlest addrõõzzâst Petsamontie 3.
Suäʹđjlest peäʹlstes vuäǯǯ juätkast muâttšeeʹli vuäʹpstummuž äiʹǧǧvaʹrrjemtaa vuõssaarǥi čiâss 10–12. Suäʹđjel kääzzkõspäiʹǩǩ lij addrõõzzâst Karistamontie 4.
– Muʹttep äävaiåårramaaiʹjid tõn diõtt, što äʹššniiʹǩǩi kääzzkõstaarb lie mottjam da kääzzkõspaaiʹǩin äʹššummuš lij occnam, särnn Kela tââʹv äʹššneǩ-kääzzkõsjuâǥǥtõõzz jååʹđteei Anne Penttilä.
Jäänmõõzz Kela-aaʹššin vuäitt håiddad neeʹttest da teʹlfoonâst
Âlddsin pukid Kela-aaʹššid vuäitt håiddad še neeʹttest leʹbe teʹlfoonâst. Kela äʹššniiʹǩǩid jurddum äʹššeemkääzzkõõzzâst leʹbe MuuKelast vuäitt ooccâd ouddõõzzid, vuõltteed meâlddõõzzid da iʹlmmted muttsin. MuuKelast vuäitt še taʹrǩsted jiiʹjjes ooccmõõžž vueʹjj da ouddõõzzi mäʹhssempeeiʹvid. MuuKela sizz ǩeeʹrjtõõđât neʹttbaŋkktiõttivuiʹm, mobiilstaanõõǥǥin leʹbe staanõk-koortin.
Teʹlfonkääzzkõõzzâst äʹššneǩ vuäǯǯ muâttšeeʹli vuäʹpstummuž neʹttäššummša da ooccmõõžž tuejjummša. Kela teʹlfoonkääzzkõs lij juõʹǩǩ arggpeeiʹv čiâss 9–16. Taarb mieʹldd teʹlfonkääzzkõõzzâst vuäitt še kueʹđđed njäälmlânji ooccmõõžž, jõs ij ni mii jeeʹres äʹššeemnääʹll ooʹnnest. Jeeʹres jieʹllempooddid kuulli kääzzkõsnââmar käunnʼje addrõõzzâst www.kela.fi/telfoonast.
Kela teʹlfoonkääzzkõʹsse vuäitt še vaʹrrjed teʹlfoonääiʹj, kuäʹss Kelast sååitat äʹššnekka suåppum ääiʹj. Ääiʹj vuäitt vaʹrrjed neeʹttest leʹbe sååiteeʹl teʹlfoonkääzzkõʹsse.
Äʹššneǩ vuäitt še äʹššeed teʹlfoon mieʹldd sääʹmǩiõʹlle. Sääʹmǩiõllsaž teʹlfoonkääzzkõʹsse kueʹđet õhttvuõđväʹlddemraukkmõõžž vuõltteeʹl neʹttpååʹšt addrõʹsse saame@kela.fi.