Kela čiõlǥad sääʹmǩiõllsaid jurddum säursmâʹttemkääzzkõõzzi ânnʼjõž-sââʹj
Kela tuʹtǩǩummuš čiõlǥad sääʹmǩiõllsaž narooʹde jurddum Kela säursmâʹttemkääzzkõõzzi ânnʼjõž-sââʹj. Čiõlǥtõõzzâst mainstââʹttet säursmâʹttemkuʹrsse vuässõõđjid da vuõltteet kõõjjõs säursmâttmõʹšše vuäʹpsteeʹj vueʹssbeäʹlid.
Kela tuʹtǩǩummuš tuejjad čiõǥltõõzz, koʹst kaartʼtet sääʹmǩiõllsai vuäinlmid Kela säursmâʹttemkääzzkõõzzin. Tuʹtǩǩummšest čiõlǥtet ouddmiârkkân, mäʹhtt tååđva äʹššneeʹǩǩ liâ leämmaž kääzzkõʹsse. Säursmâttmõʹšše vuäʹpsteei vueʹssbeäʹlin čiõlǥtet tõn, mäʹhtt säʹmmlaid vuäʹpstet säursmâttmõʹšše.
Čiõlǥtõs tuejjeet kueiʹt jeeʹres vueʹssvuârast. Čiõlǥtõs aaʹlji ǩeâđđa 2023 kaartʼtem ǩeerjlažvuõttǩičldõõǥǥin. Puõʹttjen vuârast liâ säursmâttmõʹšše vuässõõđji mainstâttmõõžž da kõõjjõs säursmâttmõʹšše vuäʹpsteeʹj vueʹssbeäʹlid. Čiõlǥtõõzz diõtt mainstââʹttet äʹššniiʹǩǩid, kook liâ vuässõõttâm sääʹmǩiõllsaid jurddum Tules- da IKKU-kuursid. Tuʹtǩǩeem-mainstâttmõõžž tuejjeet sääʹmǩiõʹlle da lääʹddǩiõʹlle.
Sääʹmǩiõllsaž säursmâttmõõžžâst liâ siõmmna tuʹtǩǩeemteâđ
Čiõlǥtõõzz vasttõstuʹtǩǩeeʹjen tåimm Kela tuʹtǩǩummuž joukkjååʹđteeʹjj Sari Miettinen. Miettinen tuʹtǩǩeemvuuʹd õhttne veiddsânji säursmâʹttemriâžldõʹǩǩe nuʹt sosiaal- da tiõrvâsvuõttkääzzkõsriâžldõʹǩǩe. Miettinen lij taʹrǩstõõllâm jeäʹrben tõn, mäʹhtt äʹššneeʹǩǩ vuäʹpstet taarbmeâldlaž säursmâʹttemkääzzkõõzzid. Mõõnni pooddin Miettinen lij tuʹtǩǩääm säursmâttmõʹšše vuäʹpstummuž vooudlaž jeäʹrdõõzzid nuʹt Kela da jeeʹres tåimmji kõskksaž õhttsažtuâj.
– Čiõlǥtõs lij taarblaž, ǥu sääʹmǩiõllsaž säursmâttmõʹšše vuäʹpstummuž da äʹššniiʹǩǩi kääzzkõstååđvaž kovveei tuʹtǩǩeemteâđ liâ tuõđi occanj. Tän čiõǥltõõzz vuâđald piâzzât pueʹrben smiõttâd sääʹmǩiõllsaid jurddum säursmâttmõõžž ooudâsviikkâmtaarbid, Sari Miettinen särnn.
Sääʹmǩiõllsaid jurddum säursmâttmõõžž ânnʼjõž-sââʹj čiõlǥtummša leät vuõǯǯum õhttsallaš priimmʼmõš Lääʹdd sääʹmteeʹǧǧest. Čiõlǥtõõzz leät plaanääm da aunstõsnoorrmõõžž leät raajjâm õõutsââʹjest sääʹmteeʹǧǧ da Lappi pueʹrrvââjjamvuuʹd eeʹttǩeeʹjivuiʹm.
Sääʹmǩiõllsaž vuäitt haaʹleen vuäǯǯad tuʹlǩǩõõzz še jeeʹres Kela jäʹrjstem säursmâttmõõžžid
Kela jääʹrjast piiri-iiʹjji måttmid sääʹmǩiõllsaid jurddum joukkmaall mieʹldd jååʹđtem säursmâʹttemkuursid. Säursmâʹttemkuursâst säursmeei vuäǯǯ tueʹrj puõʒlmest leʹbe vââʹjjest säursmummša. Kuʹrsse vuäǯǯ še teâđ puõʒlmest, verddsažtueʹrj di tueʹrj aarǥ tååimaid.
Sääʹmǩiõllsaž säursmâʹttemkuurs jäʹrjstet lääddǩiõʹlle da tuʹlǩǩeet taarb mieʹldd jeeʹres sääʹmǩiõlid. Sääʹmǩiõllsa vueiʹtte haaʹleen vuäǯǯad tuʹlǩǩõõzz še jeeʹres Kela jäʹrjstem säursmâttmõõžžid.
Kela neʹttseeidain čiõlǥtet tääʹrǩben nuʹt sääʹmǩiõllsaž säursmâʹttemkuursin ǥu jeeʹres Kela taʹrjjeem säursmâʹttemkääzzkõõzzin.
Looǥǥ lââʹzz
Säursmâʹttem- da šiõttlõõvvâmvaalmtemkuurs (kela.fi, lääddas)