Tobdstõõđ mättʼtõõđi ouddõõzzid sääʹmǩiõlin
Kela lij õlmstâttam eeʹjj 2023 Mättʼtõõđi da prizoovneeʹǩǩ -brosyyr. Brosyyr čiõlǥat še sääʹmǩiõlin, mäʹhtt Kela tuärjjad mättʼtõõđjid da armeeʹj leʹbe siviilkääzzkõõzz spraavjid di mõõn nalla ouddõõzzid ooʒʒât.
Kela õlmstâtt kalenteriiʹjji mieʹldd kääuʹc jieʹllemvueʹǩǩ meâldlaž čiõlggǩiõllsa ouddõsbrosyyr. Tõin čiččâm õlmstõʹtteš juʹn alggeeʹjjest. Ååʹn lij õlmstõttum še mââimõs brosyyr Mättʼtõõđi da prizoovneeʹǩǩ. Seämma vuâra lij peeiʹvtum brosyyr sääʹm-, eŋgglõs- da ruõššǩiõllsa versio.
Kela čiõlggǩiõllsaž ouddõsbrosyyr čiõlǥat puk mättʼtõõđji da prizoovniiʹǩǩi ouddõõzzid čiõlgglääʹddǩiõʹlle da čiõlggruõccǩiõʹlle. Brosyyr čiõlǥat, mäʹhtt Kela tuärjjad mättʼtõõđjid da armeeʹj leʹbe siviilkääzzkõõzz spraavjid di mõõn nalla ouddõõzzid ooʒʒât. Hieʹlǩeld fiʹttjemnallšem brosyyr suäpp pukid Kela äʹššniiʹǩǩid.
Brosyyʹre liâ peeiʹvtum ođđ ouddõs-suum da jeeʹres eeʹjj 2023 ouddõsmuttâz. Peeiʹvtummuž õhttvuõđâst še Mättʼtõõđi da prizoovneeʹǩǩ -brosyyr kuâsttjõs lij siõmmna ođđsmam da visuaalʼlaž ǩicstõk lij tuejjuum čiõlggsubun oouʹdab brosyyrâst.
Mättʼtõõđi da prizoovneeʹǩǩ -brosyyr sääʹmǩiõllsaid pdf-neʹttversioid vuäitt tobdstõõttâd kela.fi-seeidain. Brosyyri neʹttversioin liâ valddum lokku âsttjemvuõttõõlǥtõõzz, di nääiʹt plaađđmõš oʹnnast puârast še teâttikkânlookkjin.
Mättʼtõõđi da prizoovneeʹǩǩ ouddõõzzin vuäitt lookkâd sääʹmǩiõlin še Kela sääʹmǩiõllsaž neʹttseeidain.
Õhttsažtuâjjkueiʹm vueiʹtte tiʹllʼjed brosyyrid Kelast
Čiõlggbrosyyrid vuäǯǯ Kela- da äʹššeempaaiʹǩin. Kela vuõlttad čiõlgglääʹddǩiõllsaid- da čiõlggruõccǩiõllsaid brosyyrid jiijjâs kääzzkõspaaiʹǩeez lââʹssen še mättstroiʹttlid.
Õhttsažtuâjjkueiʹm vueiʹtte tiʹllʼjed čiõlggbrosyyrid da tõi jeeʹres ǩiõllversioid di jeeʹres Kela tiõddum brosyyrid neʹttpååʹštin Kela lomakksââʹjest addrõõzzâst lomakevarasto@kela.fi. Uuʹccmõs tiʹllʼjem-mieʹrr lij 10 lomaakk/vuõlttõs.
Sääʹmǩiõllsaž brosyyrid vuäitt tiʹllʼjed neʹttpååʹštin addrõõzzâst saame@kela.fi. Sääʹmǩiõllsaž brosyyrid vuõltteet taarbšeen še uuʹccmõs tiʹllʼjõõzz uuʹccab meäʹr.