Lääʹddjânnmest ålggjânnmid
Jõs vuäǯǯääk koon-ne Kela tuärjjõõzz da seerdak ålggjânnmid, iʹlmmet serddmõõžžâst Kelaaʹje.
Iʹlmmet še Kelaaʹje, jõs jieʹllmad mottai, ko leäk ålggjânnmin. Muuttâs vuäitt leeʹd ouddmiârkkân
- mättʼtõõttmõõžž alttummuš leʹbe jõskkmõš
- reâuggmõõžž alttummuš leʹbe jõskkmõš
- muuttâs piârkõskkvuõđinad, mâʹte rätkkjummuš pieʹllkueiʹmest leʹbe serddmõš jälsted pieʹllkuõiʹmin.
Kõskkpoddsaž avi põõšši siirdčõõttmõš?
Vuõiggâdvuõttad Kela tuärjjõõzzid tuʹmmeet takainalla tõn vuâđald, mõõn kuuʹǩǩ ääiǥak leeʹd ålggjânnmin. Tõt še vaaikat, mõõnn diõtt seerdak da koonn jânnma seerdak.
Jõs seerdak ålggjânnmid põõššjen, jiõk vueiʹt takainalla teänab vuäǯǯad Kela tuärjjõõzzid. Serddmõõžž ââʹnet põõššjen, jõs tuu mieʹrren lij jälsted ålggjânnmin pâʹjjel 6 määnpââʹj. Teʹl vuõiggâdvuõttad Kela tuärjjõõzzid takainalla poott tâʹlles, ko seerdak meädda Lääʹddjânnmest. 6 määnpââʹj äiʹǧǧraaj vueiʹtet šiõttõõllâd, jõs seerdak kõskkpoddsânji Lääʹddjânnmest EU-jânnma, Etv-jânnma, Sveiʹccjânnma leʹbe Jõnn-Britannian.
Ouddmiârkkân mättʼtõõttjin da tuâjjuʹvddi vuõltteem tuâjjlain vuäitt še leeʹd vuõiggâdvuõtt Kela tuärjjõõzzid, håʹt sij leʹčče ålggjânnmin pâʹjjel 6 määnpââʹj.
Ko seerdak jeeʹres jânnma, seʹlvvet, vuäitak-a vuäǯǯad tuärjjõõzzid ođđ jälstemjânnmastad.
Vueʹss eeʹjjest ålggjânnmin
Jõs jälstak ålggjânnmin mieʹrrkõõski pâʹjjel peäʹl eeʹjjest, tuʹst ij takainalla leäkku vuõiggâdvuõtt Kela tuärjjõõzzid. Äiʹǧǧraaj vueiʹtet šiõttõõllâd, jõs jälstak vueʹzz eeʹjjest koon-ne EU-jânnmest, Etv-jânnmest, Sveiʹccjânnmest leʹbe Jõnn-Britanniast.
Koon jânnma seerdak?
Tuärjjõõzz vuäǯǯma vaaikat tõt,koon jânnma seerdak Lääʹddjânnmest.
Kela tuärjjõõzzid vaaikat tõt, lij-a jânnam Euroopp unioon (EU) leʹbe Euroopp tällõsvuuʹd (Etv) jânnam, Sveiʹccjânnam, Jõnn-Britannia leʹbe jânnam, koivuiʹm Lääʹddjânnmest lij sosiaalstaansuåppmõš.
EU-jânnam lie
- Lääʹddjânnam
- Belgia
- Bulgaria
- Danska
- Eestijânnam
- Espanja
- Franska
- Irlantt
- Italia
- Kreikka
- Kroatia
- Kypros
- Latvia
- Liettua
- Luxemburgg
- Malta
- Nuõrttväʹldd
- Portugal
- Puola
- Romania
- Ruõcc
- Saksslajânnam
- Slovakia
- Slovenia
- Tšekk
- Unkar
- Vueʹllʼjânnam.
Etv-jânnam lie
- Euroopp unioon jânnam
- Islantt
- Liechtensteiʹnn
- Taarrjânnam.
Lääʹddjânnmest lij sosiaalstaansuåppmõš vueʹlnn looǥǥtõllum jânnmin:
- Australia
- Chile
- Intia
- Israel
- Japaan
- Kanada (da Quebec)
- Ǩiina
- Õhttõõvvâmvääʹld
- Saujj-Korea
- Tâʹvvjânnam.
Euroopplaž puõccihåiddkortt
Vuäitak tiʹllʼjed Kelast euroopplaž puõccihåiddkoort. Kortt lij määustem. Ko tuʹst lij kortt, vuäǯǯak hååid kroota puâccjummša EU-jânnmest, Etv-jânnmest, Sveiʹccjânnmest da Jõnn-Britanniast seämma hõõʹddin ko pääiklaž oummu.
Vuäitak tiʹllʼjed koort neeʹttest. Neeʹttest vuäitak tiʹllʼjed koort tuu päärnže še. Vuäitak še tiʹllʼjed koort kääzzkõsnââmrest 020 692 204.
Jõs tuʹst ij teänab leäkku vuõiggâdvuõtt Kela tuärjjõõzzid, jiõk vueiʹt ââʹnned euroopplaž puõccihåiddkoort.