Buhtadusat mátkkiin

Kela buhtte mátkkiid almmolaš dahje priváhta dearvvasvuođadikšui, juos manat dohko buohcuvuođa, áhpehisvuođa dahje riegádahttima dihte. Mátkkit buhttejuvvojit dábálaččat lagamuš dikšunbáikái ja hálbbimus johtinvuogi mielde.

Veajuiduhttinmátkkiid Kela buhtte dalle, juos veajuiduhttin vuođđuduvvá Kela dahje almmolaš dearvvasvuođadivššu veajuiduhttinmearrádussii.

Juos dus galgá leat mieđušteaddji dahje bearašlahttu fárus, sáhtát ohcat buhtadusa maiddái sin mátkegoluin.

Kela ii buhtte sierra dálkasiid viežžanmátkki apotehkii.

Táksesáhtut

Juos gárttat geavahit táksse dearvvasvuođadili dahje heajos johtolatoktavuođaid dihte, sáhtát oažžut buhtadusa maiddái táksesáhtuin. Juos geavahat táksse dearvvasvuođadili dihte, dus galgá leat dikšunlágádusa duođaštus, man namma lea Duođaštus mátkebuhtadusa várás (Todistus matkakorvausta varten SV 67).

Juohke eanangottis leat 2 diŋgonnummira, main sáhtát diŋgot Kela-táksse. Sáhtát ieš válljet, goabbát nummiris diŋgot mátkki.

Go diŋgot táksse diŋgonnummiris, oaččut mátkebuhtadusa dalán táksses. Juos diŋgot táksse gos nu eará sajis, Kela ii buhtte mátkki.

Sámeguovvlus ássi sámegielat olmmoš sáhttá goittotge diŋgot táksesáhtuid njuolgga sámegielat Kela-táksevuoddjis.

Gávnnat tákssiid diŋgonnummiriid Kela siidduin (suomagillii).

Loga lasi táksemátkkiid birra Kela siidduin (suomagillii).

Sáhtát čuovvut dutnje jagi áigge čoggon mátkegoasttádusaid neahtas.

Mátkkiid iežasvástu

Mátkkiid iežasvástu lea 25 euro mátkkis, mii manná ovtta guvlui. Juos du mátki máksá badjel 25 euro, Kela buhtte dutnje 25 euro badjel mannan supmi.

Jahkeiežasvástu dahje mátkegáhttu lea 300 euro jagis. Juos mávssat mátkkiin kaleanddarjagis ieš eanet go dan, Kela buhtte du loahppajagi mátkkiid dievasmearálažžan.

Juos mátkkoštat táksesáhtuin, it dárbbáš ohcat buhtadusa vuollái 25 euro mátkkiin. Kela rehkenasta daid oppa jagi iežasvástui, juos leat diŋgon daid diŋgonnummiris dahje geavahan sámegielat Kela-táksse.

Juos mátkkoštat eará go tákssiin, oza buhtadusa maiddái vuollái 25 euro mátkkiin.
Dalle Kela rehkenasta daid oppa jagi iežasvástui.

Buhtadus idjadeamis

Juos gárttat ovdamearkan heajos johtolatoktavuođaid dihte idjadit dikšun- ja dahje veajuiduhtiinbáikegottis, sáhtát oažžut idjadanruđa. Dat lea eanemustá 20,18 euro jándoris.

Loga lasi