Päärnaihååid tuärjjõõzz piârluõvâsvuõđ mâŋŋa | Nuõrttsääʹmǩiõll | KelaSirddu siiskõʹsse

Päärnaihååid tuärjjõõzz piârluõvâsvuõđ mâŋŋa

Puärrsiluõvâsvuõđ mâŋŋa leʹbe puärrsiteäʹǧǧpõõʹji kõõskâst vuäitak

  • vuäǯǯad dommhååid tuärjjõõzz, jõs päärnaž ij vuässõõđ kååʹdd õuddpiõmmu
  • vuäǯǯad dommhååid leʹbe privatt hååid tuärjjõõzz, jõs päärnaž vuässââtt privatt õuddpiõmmu.

Vuäitak še vuäǯǯad šiõttõllum håiddtieʹǧǧ jõs reâuǥak jäänmõsân 30 čiâssâd neäʹttlest jeäʹt-ka tuʹnne mahssu puärrsipeiʹvvtieʹǧǧid. Päärnaihååid tuärjjõõzzid jeäʹt mahssu vuâlla määnpââʹj ääiʹjest.

Dommhååid tuärjjõs

Dommhååid tuärjjõõzz vuäitt ooccâd, jõs vuâlla 3-ekksa päärna hååidat jeeʹres pääiʹǩest ǥu kååʹdd ouddpeâmmast, ouddmiârkkân dååma. Hoiʹddjeei vuäitt leeʹd päärna eʹčč leʹbe jeäʹnn leʹbe ǩii-ne jeeʹres, ouddmiârkkân äʹjj leʹbe äkk leʹbe paʹlǩǩuum hoiʹddjeei.

Vuäitak vuäǯǯad dommhååid tuärjjõõzz, ǥu päärna šõddmõõžžâst lij mõõnnâm äiʹǧǧ 160 arggpeiʹvved. Tâʹl päärnaž lij nuʹt 6 määnpââʹj ekksaž. Dommhååid tuärjjõõzz ij vueiʹt vuäǯǯad, jõs päärnaž lij kååʹdd ouddpeâmmast.

Dommhååid tuärjjõʹsse koʹlle håiddteäʹǧǧ da håiddlââʹss. Tuu dommkåʹdd vââjj mäʹhssed lââʹssen kåʹddlââʹzz.

Håiddteäʹǧǧ lij

  • nuʹtt 378 euʹrred määnpââʹjest õõut vuâlla 3-ekksaž päärnast
  • nuʹtt 113 euʹrred määnpââʹjest piârri juõʹǩǩ jeeʹres vuâlla 3-ekksaž päärnast
  • nuʹtt 73 euʹrred määnpââʹjest juõʹǩǩ pâʹjjel 3-ekksaž leâša vuâlla škooulâkksaž päärnast.

Håiddlââʹzz vuäǯǯ tåʹlǩ õõut päärnast, da tõt lij jäänmõsân nuʹtt 202 euʹrred määnpââʹjest. Håiddlââʹzz mieʹrr lij puärrsi puåttjin ǩidd.

Kook-ne kååʹdd mäʹhsse dommhååid tuärjjõõzz lââʹssen kåʹddlââʹzz. Kõõjj tuu dommkååʹddest leʹbe Kelast, vuäǯǯak-a kåʹddlââʹzz.

Dommhååid tuärjjõõzzâst määuʹset piiđ.

Privatt hååid tuärjjõs

Vuäitak vuäǯǯad privatt hååid tuärjjõõzz, jõs päärnžad håidd paʹlǩǩuum hoiʹddjeei leʹbe privatt ouddpeâmmpäiʹǩǩ. Privatt hååid tuärjjõõzz vuäitt vuäǯǯad, jõs päärnaž lij teâuddam 9 määnpââʹjjed, leša lij vuâlla škooulâkksaž. Tuärjjõõzz ij vueiʹt vuäǯǯad, jõs päärnaž lij kååʹdd ouddpeâmmast. Privatt hååid tuärjjõʹsse koʹlle håiddteäʹǧǧ da håiddlââʹss. Tuu dommkåʹdd vââjj mäʹhssed lââʹssen kåʹddlââʹzz.

Håiddteäʹǧǧ lij nuʹt 192 euʹrred määnpââʹjest. Jõs päärnaž lij vuõssmättʼtõsâkksaž da ouddpeâmmast vueʹssäiggsânji, håiddteäʹǧǧ lij nuʹt 71 euʹrred määnpââʹjest.

Håiddtieʹǧǧ lââʹssen vuäitak vuäǯǯad håiddlââʹzz. Tõt lij jäänmõsân 266 euʹrred määnpââʹjest. Håiddlââʹzz mieʹrr lij ǩidd puåttjin. Jõs vuäǯǯak uuʹccab håiddtieʹǧǧ, lij håiddlââʹss še uuʹccab.

Kela mähss privatt hååid tuärjjõõzz paʹlǩǩuum hoiʹddjeeja leʹbe ouddpeâmmpäikka.

Privatt hååid tuärjjõõzzâst määuʹset piiđ.

Šiõttõllum håiddteäʹǧǧ

Vuäitak vuäǯǯad šiõttõllum håiddtieʹǧǧ, jõs reâuǥak jäänmõsân 30 čiâssâd neäʹttlest da hååidak loppääiʹj päärnžad. Kela mähss šiõttõllum håiddtieʹǧǧ vuâlla 3-ekksaž päärnast.

Šiõttõllum håiddtieʹǧǧ vueiʹtet mäʹhssed kuhttu puärrsa. Teʹl kuhttui puärrsin âlgg tuejjeed takai vuäʹnkab tuâjjääiʹj. Suänna âʹlǧǧe håiddad päärna jeeʹres ääiʹj leʹbe jeeʹres peeiʹvi.

Šiõttõllum håiddtieʹǧǧ määuʹset tuâjjääiʹj mieʹldd. Håiddteäʹǧǧ vuäitt leeʹd juʹn-a nuʹtt 269 euʹrred määnpââʹjest leʹbe nuʹtt 179 euʹrred määnpââʹjest tõn mieʹldd, mõõn jiânnai kõskkmieʹrin reâuǥak neäʹttlest.

Kela mähss šiõttõllum håiddtieʹǧǧ seämma puärrsa tåʹlǩ õõut päärnast vuârstes.

Šiõttõllum håiddtieʹǧǧest määuʹset piiđ.

Vueʹsshåiddteäʹǧǧ

Vuäitak vuäǯǯad vueʹsshåiddtieʹǧǧ, ko reâuǥak jäänmõsân 30 čiâssâd neäʹttlest päärna håiddam diõtt. Kela mähss vueʹsshåiddtieʹǧǧ päärnast, kååʹtt lij škooulâst 1. da 2. klaassâst. Vueʹsshåiddteäʹǧǧ lij nuʹtt 108 euʹrred määnpââʹjest. Tõʹst määuʹset piiđ.

Kela mähss vueʹsshåiddtieʹǧǧ seämma puärrsa tåʹlǩ õõut päärnast vuârstes.

Seämma puärrsa jeäʹt vuõittu mäʹhssed seämma ääiʹj vueʹsshåiddtieʹǧǧ da šiõttõllum håiddtieʹǧǧ.

Seidd peeiʹvtum 16.2.2024

Mõõnn miõl leäk seeidast?