Olgoenâmijn finnejum pyecceetipšoost puáhtá tääl finniđ ovdiist stuárráb sajanmáávsu
Nubástusah laahân raajijd rastaldittee tiervâsvuođâhuolâttâsâst pottii vuáimán maŋasčyeccen. Sajanmáávsu puáhtá uuccâđ tain jiešráđálii tiipšon ucâlum koloin, moh láá šoddâm EU- tâi Eta-staatâst, Sveitsist, Stuorrâ-Britanniast tâi Tave-Irlandist 1.1.2023 tâi ton maŋa. Sajanmáksu máksoo enâmustáá ton verd, maid västideijee tipšo ličij máksám äššigâs jieijâs pyereestvaijeemkuávlust Suomâst.
Äššigâs puáhtá ucâluđ pyecceetiipšon nube EU- tâi Eta-staatân, Sveitsin, Stuorrâ-Britannian tâi Tave-Irlandin já finniđ Kelast sajanmáávsu tipšokoloin. Tiipšon puáhtá ucâluđ jiešráđálâvt teikâ táttuđ tiipšon ucâlum várás munelove Kelast.
Laahâ raajijd rastaldittee tiervâsvuođâhuolâttâsâst nubásmui 1.5.2023. Puátteevuođâst Kela sajanmáksá jiešráđálii tiipšon ucâlume koloin enâmustáá ton verd, maid västideijee tipšo ličij máksám äššigâs jieijâs pyereestvaijeemkuávlust Suomâst. Kela koijâd tárbulijd tiäđuid äššigâs pyereestvaijeemkuávlu tiervâsvuođâhuolâttâsâst. Motomijn tiilijn nubástus puáhtá merhâšiđ tom, ete Kela máksá äššigâsân ovdiist stuárráb sajanmáávsu. Nubástusah pottii vuáimán maŋasčyeccen 1.1.2023 rääjist, ađai sajanmáávsu puáhtá uuccâđ tain koloin, moh láá šoddâm 1.1.2023 tâi ton maŋa.
Tipšo kalga västidiđ tom tipšo, mii adeluvvoo Suomâst
Ko äššigâs ucâluvá jiešráđálávt tiipšon nube EU- tâi Eta-staatân, Sveitsin, Stuorrâ-Britannian tâi Tave-Irlandin, te sun kalga uuccâđ hiäivulii tipšosaje jieš já selvâttiđ, ete puáhtá-uv tobbeen finniđ tipšo.
Sajanmáávsu iähtun lii, ete tipšo lii árvuštâllum talhâstieđâlávt tárbulâžžân. Tipšo kalga västidiđ tom tipšo, maid äššigâs ličij finnim Suomâ almolii tiervâsvuođâhuolâttâsâst. Toos lasseen tiipšon tarbâšuvvoo vuolgâttâs, jis vuolgâttâs tarbâšuuččij västideijee tiipšon Suomâst.
Äššigâs kalga mäksiđ puoh tipšokoloid vistig jieš já uuccâđ sajanmáávsu maŋadist 6 mánuppaje siste tast, ko sun lii máksám tipšo.
Sajanmáksu occoo luámáttuvváin Ulkomailla syntyneet sairaanhoitokustannukset - Olgoenâmijn šoddâm pyecceetipšokoloh SV 128 (pdf, suomâkielân).
Äššigâs puáhtá táttuđ tiäđu sajanmáávsu meereest muuneeld
Äššigâs puáhtá táttuđ Kelast muuneeld tiäđu, ete finnee-uv sun olgoenâmijn adelemnáál tipšoost sajanmáávsu já mii sajanmáávsu meeri lii. Taat tiätu kočoduvvoo munealmottâssân. Kela máksá sajanmáávsu almottâsâst muštâlum vuovvijn, jis tipšo lii olášum tai tiäđui mield, maid äššigâs lii almottâm ucâmušâstis.
Munealmottâs occoo luámáttuvváin Hakemus - Ennakkoilmoitus ulkomailla annettavan sairaanhoidon korvauksesta (kela.fi, suomâkielân).
Ive 2024 aalgâst sajanmáávsu finnim sáttá vaattâđ munelove
Lahânubástus čuávumuššân ive 2024 aalgâst váldoo anon uđđâ pyecceedirektiiv miäldásâš munelope.
Motomijn tiilijn munelope lii iähtu toos, ete Kela puáhtá mäksiđ äššigâsân sajanmáávsu olgoenâmijn finnejum tipšoost. Munelope lii págulâš ovdâmerkkân talle, jis tiipšon lohtâs eromâš riskâ já tot váátá ijâstâllâm pyecceiviäsust.