Fitnodatdoalli doarjagat | Davvisámegiella | KelaMana sisdollui

Fitnodatdoalli doarjagat

Fitnodatdoalli sáhttá oažžut Kelas seamma doarjagiid go bargi. Fitnodatdoalli sáhttá maiddái oažžut buhtadusa das, ahte son ordne alcces bargodearvvašvuođafuolahusa.

Kela máksá fitnodatdoallái doarjaga YEL- dahje MYEL-bargodietnasa vuođul

Jos leat fitnodatdoalli ja oaččut barggustat doarvái ollu dietnasa, don fertet váldit ealáhatoaju.

  • YEL-oaju ferte váldit, jos du YEL-bargoboađut leat badjel 9 010,28 euro jagis.
  • MYEL-oaju ferte váldit, jos du MYEL-bargoboađut leat badjel 4 505,14 euro jagis.

Fitnodatdoalli árvvoštallá ieš, mii lea su barggu ruđalaš árvu. Dát gohčoduvvo YEL- dahje MYEL-bargodietnasin. Kela máksá fitnodatdoallái máŋggaid doarjagiid YEL- dahje MYEL-bargodietnasa vuođul. Dasa vuođđuduvvet ovdamearkka dihte áhpehisvuođaruhta, vánhemiidruhta ja buohcanbeaiveruhta.

Loga lasi fitnodatdoalli ealáhatoajuin.

Goas fitnodatdoalli sáhttá oažžut Kela bargguhisvuođadoarjaga?

Fitnodatdoalli sáhttá oažžut Kelas bargguhisvuođadoarjaga, jos fitnodatdoaibma lea nohkan. Bargguhisvuođadoarjaga sáhttá oažžut maiddái dalle, jos fitnodatdoaibma lea siidodoaibman.

Jos álggahat fitnodatdoaimma go leat bargguheapme, Kela máksá dutnje bargguhisvuođadoarjaga 4 mánotbaji áigge. Bargguhisvuođadoarjaga mearri lea gitta das, man olu oaččut fitnodagastat dietnasiid.

Go leat ožžon bargguhisvuođadoarjaga 4 mánotbaji, BE-doaimmahat dutká, leatgo ollesáigásaš vai siidodoaibmasaš fitnodatdoalli. Ollesáigásaš fitnodatdoalli geavaha fitnodatdoibmii nu olu áiggi, ahte son ii sáhte bargat eará barggu. Siidodoaibmasaš fitnodatdoalli geavaha fitnodatdoibmii unnit áiggi ja sáhttá váldit vuostá maiddái nuppi barggu. Jos du fitnodatdoaibma lea siidodoaibmasaš, Kela sáhttá máksit heivehuvvon bargguhisvuođadoarjaga. Heivehuvvon bargguhisvuođadoarjja lea unnit go dábálaš bargguhisvuođadoarjja. Ollesáigásaš fitnodatdoalli ii sáhte oažžut Kela bargguhisvuođadoarjaga.

Bargguhisvuođadoarjagat, maid Kela máksá, leat vuođđobeaiveruhta ja bargomárkandoarjja. Sáhtát oažžut vuođđobeaiveruđa dušše, jos leat bargan fitnodatdoallin doarvái guhká. Lassin YEL- dahje MYEL-bargodietnasat galget leat doarvái stuorrát. Bargomárkandoarjaga sáhtát oažžut, vaikko it livčče árabut bargan.

Loga lasi bargguhisvuođadoarjagiin.

Fitnodatdoalli bargodearvvašvuođafuolahus

Fitnodatdoalli sáhttá fuolahit iežas dearvvašvuođas go háhká bargodearvvašvuođafuolahusa. Bargodearvvašvuođafuolahus oaivvilda dearvvašvuođabálvalusaid, mat veahkehit veadjit barggus. Bargodearvvašvuođa sáhttá háhkat priváhta dearvvašvuođafitnodagain.

Kela buhtte fitnodatdoallái bargodearvvašvuođafuolahusa goluin eanemustá 50 % dahje 60 % elege sullii beali. Buhtadusa mearri lea gitta das, makkár bálvalusaid soahpamuš sisttisdoallá, man dagat bargodearvvašvuođafuolahusain.

Jos fitnodatdoalli buohccá

Jos buohccát, oza Kelas buohcanbeaiveruđa dahje oassebuohcuvuođabeaiveruđa. Beaiveruđa mearri vuođđuduvvá YEL- dahje MYEL-bargodietnasii. Loga lasi buohcanbeaiveruđas ja oassebuohcuvuođabeaiveruđas.

Jos du buohcuvuohta joatkašuvvá itge sáhte šat oažžut buohcanbeaiveruđa, sáhtát oažžut bargonávccahisvuođaealáhaga. Loga lasi bargonávccahisvuođaealáhagas.

Jos dárbbašat veajuiduhttima, sáhtát searvat ámmátlaš veajuiduhttimii. Dan ordnejit bargoealáhatlágádusat. Loga lasi ámmátlaš veajuiduhttimis (tyoelake.fi, suomagillii).

Dus sáhttá leat maiddái vejolašvuohta searvat veajuiduhttimiidda, maid Kela ordne. Ovdamearkka dihte Kiila-veajuiduhttin heive maiddái fitnodatdolliide. Dan ulbmilin lea veahkehit veadjit barggus. Loga lasi veajuiduhttimiin, maid Kela ordne ja Kiila-veajuiduhttimis (suomagillii).

Sámegielat olmmoš sáhttá, jos háliida, oažžut dulkoma buot veajuiduhttimiidda, maid Kela ordne.

Jos fitnodatdoallis leat unna dietnasat

Jos dus leat unna dietnasat, sáhtát ohcat Kelas almmolaš ássandoarjaga ja áigáiboahtindoarjaga. Almmolaš ássandoarjja veahkeha ássangoluid máksimis. Áigáiboahtindoarjaga sáhtát oažžut, jos du boađut ja várit eai dattege reahkká vealtameahttun goluide, dego borramuššii ja ássamii.

Jos fitnodatdoalli ohcá áigáiboahtindoarjaga, Kela čielggada ovdal doarjaga máksima, leago fitnodatdoaibma gánnáhahtti.

Doarjagiidda sáhttet váikkuhit iežat boađuid lassin eará olbmuid boađut, geat orrot seamma visttis.

Loga lasi ássandoarjagis ja áigáiboahtindoarjagis fitnodatdolliide (suomagillii).

Mánnábearaš oažžu doarjaga áhpehisvuođa ja máná divššu áigái

Jos oaččut máná, sáhtát oažžut vánhemiidbeaiveruđaid elege áhpehisvuođaruđa, sierraáhpehisvuođaruđa dahje vánhemiidruđa. Daid mearri vuođđuduvvá YEL-dahje MYEL-bargodietnasii.

Vánhemiidbeaiveruđaid maŋŋá sáhtát oažžut mánáiddikšuma doarjagiid.

Loga lasi vánhemiidbeaiveruđain ja mánáiddikšuma doarjagiin.

Fitnodatdoalli sáhttá oažžut ealáhaga bargoealáhatlágádusas ja Kelas

Fitnodatdoalli fuolaha ieš ealáhagas, man son maŋŋel oažžu. Ealáhaga oažžuma várás fitnodatdoalli galgá máksit YEL- dahje MYEL-ealáhatoaju.

Sáhtát ohcat ealáhaga go leat ealáhatagis. Oza bargoealáhaga dan bargoealáhatlágádusas, mas dus lea leamaš YEL- dahje MYEL- ealáhatoadju. Jos du bargoealáhat lea unni dahje it oaččo dan ollenge, sáhtát oažžut Kelas álbmotealáhaga.

Sáhtát muhtun diliin báhcit ealáhahkii juo ovdal aitosaš ealáhatagi. Dalle sáhtát oažžut áraduvvon boarrásiidealáhaga dahje bargonávccahisvuođaealáhaga.

Loga lasi ealáhagain, maid Kela máksá.

Loga lasi

Maid jurddašat siiddu birra?