Kela õlmstõõʹtti ođđ säursmâttmõõžž materiaalid sääʹmǩiõʹlle
Kela õlmstõõʹtti eeʹjj 2024 aalǥâst määŋgaid ođđ säursmâttmõʹšše õhttneei sääʹmǩiõllsaž lomaakkid. Seämmavuâra ođsmõʹvve säursmâttmõõžžâst čiõlǥteeʹj čiõlggǩiõllsaž da sääʹmǩiõllsaž kela.fi-seeid. Obbvuõđ tiuddad ođđ Säursmâʹttem-brosyyr.
Kela õlmstõõʹtti eeʹjj aalǥâst kääuʹc ođđ sääʹmǩiõllsaž ooccâmlomaakk. Šuurmõs vueʹss ođđ lomaakkin õhttan säursmâttmõʹšše. Ođđ lomaakkin vuäitt ooccâd ouddmiârkkân veäʹǩǩneävvaid leʹbe säursmâʹttemtieʹǧǧ. Lââʹssen Kela lij juʹn ääiʹjab õlmstâttam sääʹmǩiõllsaž lomaakkid, koin vuäitt ooccâd Kela jäʹrjstem säursmâttmõõžžid.
Sääʹmǩiõllsaž lomaakk käunnʼje kela.fin sääʹmǩiõllsaž seeidain pääiʹǩest Lomaakk. Lomaakk vuäitt laaddâd jiijjâs mašinaaʹje, tiuddeed liâdǥlânji da tååimted Kela sizz äʹššeemkääzzkõs MuuKelast (OmaKela).
Pdf-lomaakk tiuddummša teâttmašinain taarbšet ođđ versio Adobe Reader -prograammâst. Prograamm vuäitt laaddâd määustaa Adobe neʹttseeidain. Lomaakk vuäitt še priʹnttjed da tiuddeed ǩiõđin ǩeeʹrjteeʹl. Ooccâmlomaakk vuäǯǯ še taarbšeen põʹmmjen Kela kääzzkõs- leʹbe äʹššeempääiʹǩest.
Sääʹmǩiõllsaž äʹššneeʹǩǩ taarbše še täʹst ooudâs lomaakkid, ǥu MuuKelast ouddõõzzid ij vueiʹt veâl ooccâd sääʹmǩiõʹlle.
Säursmâttmõʹšše ođđ čiõlggǩiõllsa da sääʹmǩiõllsa neʹttseeid
Kela oođii eeʹjj aalǥâst säursmâttmõõžžâst čiõlǥteeʹj čiõlggǩiõllsaž da sääʹmǩiõllsaž kela.fi-seeidaid. Ođđ seeidain čiõlǥted säursmâttmõõžžâst jeeʹres ââʹǩǩjoouki – päärnai da nuõri, tuâjjâkksai da puäʹres oummui – ǩiõččâmvueʹjjest.
Sääʹmǩiõllsaž kela.fi-seeidain čiõlǥted lââʹssen jeäʹrben sääʹmǩiõllsaž oummuid jurddum säursmâttmõõžžâst di säursmeeʹj ǩiõllʼlaž vuõiggâdvuõđin.
Sääʹmǩiõllsaž äʹššneeʹǩǩ vueiʹtte taarbšeen vuäǯǯad tuʹlǩǩõõzz še jeeʹres Kela jäʹrjstem säursmâttmõõžžid.
Eeʹjj 2024 ouddõsbrosyyr õlmstââʹttet še sääʹmǩiõʹlle
Kela čiõlggǩiõllsa ouddõsbrosyyr eeʹjjest 2024 õlmstââʹttet ođđeeʹjjmannust. Sääʹmǩiõllsaž brosyyr õlmstââʹttet täʹlvvmannu aalǥâst. Sääʹmǩiõllsaž brosyyrid vuäǯǯ Kela tââʹvbeäʹl kääzzkõs- da äʹššeempaaiʹǩin. Brosyyrid pååʹštʼtet še õhttsažtuâjjkuõiʹmid sääʹmvuuʹdest.
Tän eeʹjjest ouddõsbrosyyr lie ååuʹc. Säursmâttmõõžžâst čiõlǥtet jiijjâs brosyyrâst, da tõt lij samai ođđ brosyyr. Ođđ Säursmâttmõš-brosyyʹre vuäitt juʹn tobdstõõttâd kela.fist
Tiõddum brosyyrid vuäitt tiʹllʼjed neʹttpååʹšt addrõʹsse lomakevarasto@kela.fi. Sääʹmǩiõllsaž tiʹllʼjõõzz vuäitt vuõltteed addrõʹsse saame@kela.fi.
Looǥǥ lââʹzz