Kela doarjagat stuđentii
Kela sáhttá mieđihit stuđentii oahppodoarjaga.
Oahppodoarjagii gullet
- oahpporuhta
- oahpporuđa fuolaheaddjibajádus
- oahpporuđa oahppomateriálalassi
- oahppoloana stáhtadáhkádus
- ássanlassi.
1.8.2025 rájes studeanttat ožžot dábálaččat oahppodoarjaga ássanlasi. Jos ásat iežat dahje beallalaččat mánáin, sáhtát oažžut ain almmolaš ássandoarjaga.
Loga lasi almmolaš ássandoarjagis.
Eará Kela doarjagat stuđentii leat ovdamearkka dihte
- skuvlamátkedoarjja
- oahppoloatnageahpádus
- oahppoloana reantodoarjja
- boradandoarjja.
Gii oažžu oahppodoarjaga?
Sáhtát ohcat oahppodoarjaga, go álggahat stuđerema vuođđoskuvlla maŋŋá.
Sáhtát oažžut oahppodoarjaga, jos stuđeret
- logahagas
- ámmátlaš oahppolágádusas
- allaskuvllas
- álbmotallaskuvllas.
Sáhtát oažžut oahppodoarjaga maiddái vuođđoskuvlii, jos čađahat dutkanskuvlejupmái válbmejeaddji skuvlema dahje rávesolbmuid vuođđooahpahusa.
Jos leat rávisolbmuidlogahagas, it vealttakeahttá oaččo oahppodoarjaga. Sáhtát oažžut oahppodoarjaga dušše dalle, jos dus lea riekti nuvttá skuvlejupmái dahje leat čađaheamen ovttastuvvon dutkosa. Ovttastuvvon dutkkus oaivvilda dan, ahte čađahat seammaáigásaččat ámmátlaš vuođđodutkosa ja logahaga.
Sáhtát jearrat du oahppolágádusas, leago dus riekti nuvttá skuvlejupmái.
Du iežat boađut ja muhtumin maiddái du vánhemiid boađut sáhttet váikkuhit dasa, oaččutgo don oahppodoarjaga.
Jos stuđeret olgoriikkain, sáhtát oažžut oahppodoarjaga Suomas. Dus galget goittotge leat bissovaš oktavuođat Supmii ovdamearkka dihte ássama dahje bearašgaskavuođaid bokte.
Gii ii oaččo oahppodoarjaga?
It sáhte oažžut oahppodoarjaga, jos oaččut ovdamearkka dihte čuovvovaš doarjagiid:
- bargguhisvuođadoarjaga
- buohcanbeaiveruđa
- veajuiduhttinruđa oahpuid várás
- ealáhaga (ii guoskka bearašealáhaga)
- oahppodoarjaga olgoriikkain
- rávesolbmuidskuvlendoarjaga.
Jos oaččut rávesolbmuidskuvlendoarjaga, sáhtát goittotge oažžut oahppoloana stáhtadáhkádusa.
It oaččo oahppodoarjaga dallege, jos
- leat bargofápmoskuvlemis
- leat oahpposoahpamušskuvlemis
- leat vearjo- dahje siviilabálvalusas.
Jos boađát olgoriikkain Supmii stuđeret, it dábálaččat sáhte oažžut oahppodoarjaga.
Buohccán
Jos buohccát stuđerema áigge, sáhtát báhcit buohcanlupmui ja ohcat Kelas buohcanbeaiveruđa.
Jos dutnje mieđihuvvo buohcanbeaiveruhta, Kela heaittiha oahppodoarjaga automáhtalaččat.
Vearjo- ja siviilabálvalus
It sáhte oažžut oahppodoarjaga vearjo- dahje siviilabálvalusa áigge. Jos oaččut oahppodoarjaga ja manat vearjo- dahje siviilabálvalussii, almmut das Kelai. Kela heaittiha oahppodoarjaga. Sáhtát ohcat doarjaga ođđasit, go joatkkát oahpuid.
Sáhtát heaittihit oahppodoarjaga ja ohcat dan ođđasit MuKelas.
Oahppodoarjja logahatstuđentii ja ámmátstuđentii
Kela sáhttá juolludit oahppodoarjaga logahatoahpuide ja ámmátlaš skuvlejupmái. Rávesolbmuidlogahagas sáhtát oažžut doarjaga dušše dalle, jos dus lea vuoigatvuohta nuvttá skuvlejupmái dahje čađahat ovttastuvvon dutkosa.
Sáhtát oažžut doarjaga maiddái eará oahpuide, ovdamearkka dihte
- oahpuide álbmotallaskuvllas dahje valáštallanskuvlenguovddážis
- válbmejeaddji skuvlemii, ovdamearkka dihte TUVA-skuvlemii
- rávesolbmuid vuođđooahpahussii.
Oaččut oahppodoarjaga mearreáigái.
Logahatoahpuide doarjja juolluduvvo goalmmát oahppojagi lohppii. Ámmátlaš oahpuin doarjja juolluduvvo oahpuid viidodaga vástideaddji áigái.
Jos du oahput bistet guhkit, don fertet ohcat lasseáigái doarjaga sierra. Jos gearggat oahpuiguin ovdalgo leat plánen dahje gaskkalduhtát oahpuidat, de muitte almmuhit áššis Kelai.
Oahppodoarjja allaskuvlastuđentii
Sáhtát oažžut oahppodoarjaga, go leat čađaheamen
- allaskuvladutkosa universitehtas dahje ámmátallaskuvllas
- ámmátallaskuvlaoahpuide válbmejeaddji, sisafárrejeaddjiide dárkkuhuvvon skuvlejumi
- sierra árvosáni dahje oahppoollisvuođa allaskuvladutkosa maŋŋá.
Oahpuid viidodat váikkuha dasa, man guhká sáhtát oažžut oahppodoarjaga. Ovtta lohkanjagi áigge oahppodoarjja máksojuvvo dábálaččat 9 mánotbajis.
Vai don oaččut oahppodoarjaga, oahput galget ovdánit. Kela čuovvu oahpuid ovdáneami.
Man olu oahppodoarjaga oažžu?
Jos dus eai leat mánát, sáhtát oažžut oahpporuđa ja oahppoloana, eanemustá sullii 1 130 euro mánotbajis. Dán supmis sullii 280 euro lea oahpporuhta ja 850 euro lea oahppoloatna. Jos dus leat mánát, sáhtát oažžut oahpporuhtii bajádusa.
Lassin sáhtát oažžut oahppodoarjaga ássanlasi, jos ásat láigolažžan dahje ássanvuoigatvuođavisttis. Ássanlasi mearrái váikkuha láiggu mearri ja dat, man gielddas ásat.
Sáhtát árvvoštallat rehkenastiin, man olu oaččut stuđeantta doarjagiid (suomagillii).