Jeeʹres tuärjjõõzz jeältõkvuäǯǯja

Kela mähss jeältõkvuäǯǯja täid tuärjjõõzzid:

• jeältõõǥǥ vuäǯǯai håiddtuärjjõs
• oummu, kååʹtt vuäǯǯ jeältõõǥǥ, håiddtuärjjõs
• rintamalââʹss da pâʹjjelmeärrsaž rintamalââʹss
• piʹrǧǧeemtuärjjõs.

Täin tuärjjõõzzin ij mõõn piiđ.

Päʹrnnpââjõs

Jõs leäk jeältõõǥǥâst da jälstak vuâlla 16-ekksaž päärnain, vuäitak ooccâd Kelast päʹrnnpaajõõzz. Tõn vuäǯǯ jiijjâs da pieʹllkueiʹm päärnain.

Päʹrnnpââjõs lij nuʹt 26 euʹrred määnpââʹjest õõut päärna mieʹldd.

Vuäitak vuäǯǯad päʹrnnpaajõõzz še tâʹl, jõs päärnžad jäälast jeeʹres sââʹjest. Ton õõlǥak kuuitâǥ ââʹnned huõl päärna piʹrǧǧummšest uuʹccmõsân jeäʹltemtuärjjõõzz meäʹr veeʹrd leʹbe nuʹt 198 eeuʹrin määnpââʹjest.

Vuäitak vuäǯǯad päʹrnnpaajõõzz, håʹt jiõk vuäǯǯči narodjeältõõǥǥ. Jeeʹres jeältõõǥǥ vueiʹtte še vuõiggâʹtted päʹrnnpââjõʹsse.

Looǥǥ lââʹzz päärnažpââjõõzz ooccmest (lääddas).

Jeältõkvuäǯǯai jälstemtuärjjõs

Vuäitak vuäǯǯad Kelast jeältõkvuäǯǯai jälstemtuärjjõõzz, jõs tuu puåtti lie occka da vuäǯǯak jeältõõǥǥ, kååʹtt oudd vuõiggâdvuõđ jeältõkvuäǯǯai jälstemtuärjjõʹsse. Kela vuäitt mäʹhssed tuärjjõõzz še vuoʹkrjejja.

Vuäitak ooccâd jeältõkvuäǯǯai jälstemtuärjjõõzz

• jõs jälstak õhttu
• jõs jälstak kuâhttast pieʹllkuõiʹminad
• jõs jälstak määŋgain oummuin õõutsââʹjest da tij puk vuäǯǯveʹted jeältõõǥǥ, kååʹtt oudd vuõiggâdvuõđ jeältõkvuäǯǯai jälstemtuärjjõʹsse.

Jõs tuäna kuhttu, ton da tuu pieʹllkueiʹmm, vuäǯǯveʹted jeältõõǥǥ, kååʹtt oudd vuõiggâdvuõđ eältõkvuäǯǯai jälstemtuärjjõʹsse, ooccâd jälstemtuärjjõõzz õhttsaž ooccmõõžžin. Jälstemtuärjjõõzz määuʹset tuännʼja peällʼlõõžži.

Jiõk vueiʹt vuäǯǯad jeältõkvuäǯǯai jälstemtuärjjõõzz, jõs vuäǯǯak tåʹlǩ ouddmiârkkân vueʹssreâuggpââʹstʼteʹmesvuõttjeältõõǥǥ leʹbe ääʹjuum vueʹsspuäʹresvuõttjeältõõǥǥ.

Vuäitak kõõččâd jeältõkvuäǯǯai jälstemtuärjjõõzz pirr kääzzkâʹsttemnââmrest 020 692 202.

Jõs jiõk vueiʹt vuäǯǯad jeältõkvuäǯǯai jälstemtuärjjõõzz, seʹlvvet, vuäitak-a vuäǯǯad takai jälstemtuärjjõõzz. Takai jälstemtuärjjõõzz pirr vuäitak kõõččâd kääzzkâʹsttemnââmrest 020 692 210.

Looǥǥ lââʹzz jeältõkvuäǯǯai jälstemtuärjjõõzz ooccmest (lääddas).

Jeältõõǥǥ vuäǯǯai håiddtuärjjõs

Jõs toiʹmmjempâstlvažvuõtt lij huânnʼnam puõʒʒâlm leʹbe vââʹjj diõtt, vuäitak vuäǯǯad Kelast håiddtuärjjõõzz. Tõin koʹrvveet še puõʒlmest leʹbe vââʹjjest šõddi koolaid.

Vuäitak vuäǯǯad håiddtuärjjõõzz, jõs pâsttmõššad ââʹnned huõl jijstad lij huânnʼnam eeʹjj ääiʹj. Tõt miârkkšââvv, što taarbšak vieʹǩǩ leʹbe hååid juõʹǩǩpeivvsaž tååimain.

Håiddtuärjjõõzz määuʹset veäʹǩǩtaarb da koolai mieʹldd jeeʹres meäʹr:

• Vuâđđhåiddtuärjjõs lij nuʹt 85 euʹrred määnpââʹjest.
• Pââʹjuum håiddtuärjjõs lij nuʹt 184 euʹrred määnpââʹjest.
• Ââʹlmõs håiddtuärjjõs lij nuʹt 390 euʹrred määnpââʹjest.

Vuäitak vuäǯǯad håiddtuärjjõʹsse veteraanlââʹzz, jõs vuäǯǯak pâʹjjelmeärrsaž rintamalââʹzz da jeältõõǥǥ vuäǯǯai pââʹjuum leʹbe pââimõs håiddtuärjjõõzz. Veteraanlââʹzz lij nuʹt 128 euʹrred määnpââʹjest.

Tuu puåtti leʹbe jällmõš jie vaaikât håiddtuärjjõõzz vuäǯǯma.

Håiddtuärjjõõzz miõđât juʹn-a meäʹrteʹmes ääiǥas leʹbe mieʹrrääiǥas.

Jiõk vueiʹt vuäǯǯad jeältõõǥǥ vuäǯǯai håiddtuärjjõõzz, jõs vuäǯǯak vueʹssreâuggpââʹstʼteʹmesvuõttjeältõõǥǥ leʹbe ääʹjuum vueʹsspuäʹresvuõttjeältõõǥǥ. Tõn sâjja vuäitak ooccâd Kelast lääʹmesvuõtt-tuärjjõõzz.

Looǥǥ lââʹzz jeältõõǥǥ vuäǯǯai håiddtuärjjõõzz ooccmest (lääddas).

Rintamalââʹss da pâʹjjelmeärrsaž rintamalââʹss

Vuäǯǯak Kelast rintamalââʹzz, jõs tuʹst lij mii-ne täin tiõttin:

• rintamasääldat-tiõtt
• rintamakääzzkâʹsttemtiõtt
• rintamatiõtt.

Tiõttid ij vueiʹt teänab ooccâd.

Rintamalââʹzz vuäǯǯa še oummu, kook lie vuässõõttâm miinnraiʹvvjemtuâjaid iiʹjji 1945–1952.

Rintamalââʹss lij nuʹt 203 euʹrred määnpââʹjest. Puåtti leʹbe jällmõš jie vaaikât rintamalâssa.

Puåtti leʹbe jällmõš jie vaaikât rintamalâssa. Jõs vuäǯǯak rintamalââʹzz da narodjeältõõǥǥ, vuäǯǯak Kelast še pâʹjjelmeärrsaž rintamalââʹzz. Šuurmõs pâʹjjelmeärrsaž rintamalââʹss lij nuʹt 305 euʹrred määnpââʹjest.