Škooulmäʹtǩǩtuärjjõs da porrmõštuärjjõs | Nuõrttsääʹmǩiõll | KelaSirddu siiskõʹsse

Tuärjjõs škooulmaaʹtǩid da porrmõõžžid

Škooulmäʹtǩǩtuärjjõs

Škooulmäʹtǩǩtuärjjõõzzâst lie jeeʹres määin mättʼtõõttjid, koin lij vuõiggâdvuõtt määusteʹmes škooultõʹsse, da jeeʹres mättʼtõõttjid.

Škooulmäʹtǩǩtuärjjõs mättʼtõõttja, ǩeäʹst lij vuõiggâdvuõtt määusteʹmes škooultõʹsse

Vuäitak vuäǯǯad tuärjjõõzz škooulmaaʹtǩääd, jõs spraavak ouddmiârkkân

  • lookkjiškooulmäättaid leʹbe vuõrâsoummilookkjiškooulmäättaid
  • ämmtallaš vuâđđtuʹtǩǩõõzz
  • ämmat-tuʹtǩǩõõzz
  • valmštõʹtti škooultõõzz, ouddmiârkkân TUVA-škooultõõzz
  • mättõõlǥtum oummid jurddum luõvâs čuõvtemtuâj škooultõõzz.

Ǩeäʹst lij vuõiggâdvuõtt määusteʹmes škooultõʹsse?

Tuʹst lij vuõiggâdvuõtt määusteʹmes škooultõʹsse, jõs teâudak kuhttuid täid määinaid:

  • Leäk ǩiõrggnam vuâđđškooulâst eeʹjj 2021 leʹbe tõn mâŋŋa.
  • Leäk šõddâm eeʹjj 2004 leʹbe tõn mâŋŋa.

Vuäitak vuäǯǯad tuärjjõõzz, jõs tuu škooulmäʹtǩǩ lij õõut årra uuʹccmõsân 7 ǩilomettred.

Jõs tuʹst lie uuʹccmõsân 15 mäʹtǩǩpeiʹvved kaʹlndarmäänpââʹjest, vuäitak vuäǯǯad tiuddmeärrsaž škooulmäʹtǩǩtuärjjõõzz. Jõs tuʹst lie 10–14 mäʹtǩǩpeiʹvved kaʹlndarmäänpââʹjest, vuäitak vuäǯǯad škooulmäʹtǩǩtuärjjõõzz, leâša tuärjjõõzz mieʹrr lij pieʹll tiuddmeärrsaž tuärjjõõzzâst.

Jõs âânak tuu škooulmääʹtǩest õõlmâs jååttlõõǥǥ leʹbe škoouljååʹđtummuž, jiõk takainalla määuʹs maaʹtǩinad ni mâid.

Škooulmäʹtǩǩtuärjjõs mättʼtõõttja, ǩeäʹst ij leäkku vuõiggâdvuõtt määusteʹmes škooultõʹsse

Vuäitak vuäǯǯad tuärjjõõzz škooulmaaʹtǩääd, jõs spraavak ouddmiârkkân

  • lookkjiškooulmäättaid
  • ämmtallaš vuâđđtuʹtǩǩõõzz
  • valmštõʹtti škooultõõzz, ouddmiârkkân TUVA-škooultõõzz.

Vuäitak vuäǯǯad tuärjjõõzz, jõs tuu škooulmäʹtǩǩ õõut årra lij uuʹccmõsân 10 ǩilomettred.

Jõs tuʹst lie uuʹccmõsân 15 mäʹtǩǩpeiʹvved kaʹlndarmäänpââʹjest, vuäitak vuäǯǯad tiuddmeärrsaž škooulmäʹtǩǩtuärjjõõzz. Jõs tuʹst lie 10–14 mäʹtǩǩpeiʹvved kaʹlndarmäänpââʹjest, vuäitak vuäǯǯad škooulmäʹtǩǩtuärjjõõzz, leâša tuärjjõõzz mieʹrr lij pieʹll tiuddmeärrsaž tuärjjõõzzâst.

Što vuäitak vuäǯǯad tiuddmeärrsaž tuärjjõõzz, mäinnan lij mäʹtǩǩpeeiʹvi meäʹr lââʹssen, što tuu määʹtǩ mäʹhsse pâʹjjel 54euʹrred määnpââʹjest. Teʹl määusak takainalla maaʹtǩin jiõčč 43 euʹrred määnpââʹjest.

Što vuäitak vuäǯǯad peäʹl tiuddmeärrsaž tuärjjõõzzâst, mäinnan lij mäʹtǩǩpeeiʹvi meäʹr lââʹssen, što tuu määʹtǩ mäʹhsse pâʹjjel 27 euʹrred määnpââʹjest. Teʹl määusak takainalla maaʹtǩin jiõčč 21,50 euʹrred määnpââʹjest.

Vuäitak vuäǯǯad škooulmäʹtǩǩtuärjjõõzz, håʹt-i tuu määʹtǩ mäʹhsse ooʹccab, jõs âânak koidne täin:

  • Waltti-jååttlõk, kååʹtt tåimmai määŋgast gåårdest
  • Heʹlssen vuuʹd jååttlõk HSL
  • Tampere vuuʹd jååttlõk Nysse
  • Turku vuuʹd jååttlõk Föli
  • škoouljååʹđtõs
  • jiõčč jäʹrjstum jååʹttemnääʹll.

Vuäǯǯak lââʹssteâđaid Waltti-jååttlõõǥǥâst addrõõzzâst waltti.fi (lääddas).

Škoouljååʹđtummuš miârkkšââvv, što mättstrooiʹtel leʹbe kåʹdd jääʹrjast tuʹnne škoouljååʹđtummuž leʹbe vuästt tuʹnne mäʹtǩǩliippid škooulmätkka.

Jõs tuu ââʹnnmest ij leäkku õõlmâs jååttlõk leʹbe škoouljååʹđtummuš, vuäitak jååʹtted škoouʹle tuu jiõčč vaʹlljeem naaʹlin, ouddmiârkkân jiijjad aautin leʹbe puärraz mieʹldd.

Ärvvtõõl laʹsǩǩeem-mašinain, mâʹmmet vuäitak vuäǯǯad tuärjjõõzz (lääddas).

Škooulmäʹtǩǩtuärjjõõzz ooccâm

Ooʒʒ škooulmäʹtǩǩtuärjjõõzz OmaKelast (lääddas).

Huõlteejad vuäitt ooccâd tuärjjõõzz OmaKelast peäʹlstad.

Kela mähss tuärjjõõzz jååʹttemnäälad mieʹldd vuõiʹǧǧest lippkaaupšeeja, mättstroiʹttla leʹbe tuʹnne.

Tuʹst feʹrttai jeeʹrab ooccâd škooulmäʹtǩǩtuärjjõõzz juõʹǩǩ lookkâmeeʹjj.

Porrmõštuärjjõs

Õllškooulmättʼtõõtti vuäitt vuäǯǯad vuâlõõzz porrmõõžžin poorrâmpaaiʹǩin, kook lie mieʹldd porrmõštuärjjõõzzâst.

Määusak porrmõõžžâst uuʹccab, ko čuäʹjtak mättʼtõõttikoort leʹbe Kela porrmõštuärjjõskoort.

Poorrâmpääiʹǩ, kook lie mieʹldd porrmõštuärjjõõzzâst (lääddas).

Seidd peeiʹvtum 23.8.2023

Mõõnn miõl leäk seeidast?