Kela oođâsǩiiʹrji tiʹllʼjõsrekister
Ǩiõttʼtõõllmõõžž jurddjen lij oođâsǩiiʹrji vuõlttummuš Kelast oođâsǩiiʹrji tiʹllʼjeeja. Persoonteâđaid jeät luõvtuku åålǥpeällsaid leʹbe õnnu kaauplaž markknâʹsttem-miõlâst.
Kela oođâsǩiiʹrji addrõsrekisteeʹr teâttsuõjjčiõlǥtõs
1 Rekistertuõʹllʼjeei
KANSANELÄKELAITOS (Kela), PL 450, 00056 HELSINKI
leʹbe Nordenskiöldinkatu 12 250 HELSINKI
020 634 11
https://www.kela.fi/hallinto-yhteystiedot
2 Õhttvuõttooumaž rekisteeʹr kuõskki aaʹššin
Siiri Kärkkäinen
teʹlf. 020 634 11 (kõõskõs)
3 Rekisteeʹr nõmm
Kela oođâsǩiiʹrji addrõsrekister
4 Persoonteâđai ǩiõttʼtõõllmõõžž juurd da ǩiõttʼtõõllmõõžž vuâđđ
Ǩiõttʼtõõllmõõžž jurddjen lij oođâsǩiiʹrji vuõlttummuš Kelast oođâsǩiiʹrji tiʹllʼjeeja. Rekister nårrai jm. oođâsǩeeʹrj tiʹllʼjõslomaakk pääiʹǩ puättam tiʹllʼjõõzzin (kč. päiʹǩǩ 6). Oođâsǩeeʹrj tiʹllʼjeen tiʹllʼjeei oudd miâsttmõõžž teâđeez ǩiõttʼtõõllmõʹšše.
Oođâsǩeʹrjjneävv seuʹrrai pikseeʹli veäkka oođâsǩeeʹrj da liiŋki äävummuž oođâsǩiiʹrji õõudâsviikkâm diõtt:
- koid aaʹššid oođâsǩiiʹrjin lij lokkum
- koi peeiʹvi da äiʹǧǧpooddi oođâsǩeʹrjj lij lokkum.
Teâđaid vuäitt seuʹrrjed ooumažtääʹzz mieʹldd. Tåʹlǩ oođâsǩiiʹrji raajjʼjin lij vaʹstteemtuâjeez meâldlânji vuõiggâdvuõtt seuʹrrjed statistiikid.
Persoonteâđaid jeät luõvtuku åålǥpeällsaid leʹbe õnnu kaauplaž markknâʹsttem-miõlâst.
5 Rekisteeʹr teâttsiiskõs
Rekisteeʹrest lie tän juâǥǥtõõllmõõžž meâldlaž teâđ äʹššniiʹǩǩin: neʹttpååʹštaddrõs da tuâǥǥorganisaatio. Lââʹssen liiŋki ääʹveemseuʹrrjummuš äuʹǩǩad IP-addrõõzzid.
6 Vuâkkõõzz meâldlaž teâttkääiv
Rekisteeʹr noorât Kela saaǥǥtõõzz õhttsažtuâjjkuõiʹmi addrõsteâđain, õlmmsest vuäǯǯmest åårrai interneʹttkääivain da oođâsǩeeʹrj tiʹllʼjõslomaakk pääiʹǩ puättam tiʹllʼjõõzzin.
7 Teâđai vuâkkõõzz meâldlaž luõvtummuž
Jie vuâkkõõzz meâldlaž luõvtummuž.
8 Teâđai serddmõš EU leʹbe ETA åålǥpeälla
Teâđaid jeät sirddu EU- leʹbe ETA-jânnmi åålǥpeälla.
9 Persoonteâđai seeiltemäiʹǧǧ
Persoonteâđaid seeiltet nuʹtt kuuʹǩǩ, ǥu tiõttum oođâsǩeeʹrj õlmstââʹttet. Persoonteâđ jäuʹǩǩe, jõs tiʹllʼjeei looppad pukid oođâsǩeʹrjjtiʹllʼjõõzzid. Persoonteâđ jäuʹǩǩe še teʹl, jõs neʹttpååʹštaddrõs ij leäkku teänab toiʹmmjummšest.
10 Rekisteeʹr suõjjõõzz vuâđđjurddi
Kela tuejjad tärkka pukin tååimain da ainsmâtt, što teâttsuõjj da teâttstaanvuõtt teâuddje.
Puk Kela tuâjjla, kookk ǩiõttʼtâʹlle persoonteâđaid, ouʹdde jiântta-åårramčõnnõõttmõõžž. Rekisteeʹrest åårrai teâđaid âʹnne ââʹnnemvuõiggâdvuõđeez meâldlânji tåʹlǩ tõk oummu, kookk taarbše teâđaid tuâjaines.
11 Vuõiggâdvuõtt vuäǯǯad piâssmõõžž teâđaid
EU aalmjallaš teâttsuõjjasetõõzz (EU 2016/679) 15. artikla mieʹldd rekisterõsttum oummust lij vuõiggâdvuõtt vuäǯǯad piâssmõõžž suu kuõskki persoonteâđaid. Tät miârkkšââvv tõn, što rekisteeʹrest åårrai oummust lij vuõiggâdvuõtt täʹrǩsted jiiʹjjes kuõskki teâđaid.
Jõs rekisterõsttum ooumaž haaʹlad täʹrǩsted jiiʹjjes kuõskki teâđaid, son âlgg raukkâd teâđaid Kelast.
Raukkmõõžž vuäitt vuõltteed Kela ǩeeʹrjeempäikka kirjaamo@kela.fi.
Raukkmõõžž vuäitt še uʹvdded teʹlfoonin, äʹššeeʹl Kela kääzzkõspääiʹǩest leʹbe vuõltteeʹl saakkân MuuKelast.
12 Vuõiggâdvuõtt vuõiǥeed puäst teâđaid
Teâttsuõjjasetõõzz 16. artikla mieʹldd rekisterõsttum oummust lij vuõiggâdvuõtt õõlǥted rekisteeʹrest åårrai jiiʹjjes kuõskki puäst teâđ vuõiǥummuž.
Tiʹllʼjeei vuäitt vuõiǥeed puäst teâđ oođâsǩeeʹrj looppâst åårrai liiŋk pääiʹǩ.
13 Vuõiggâdvuõtt teâđai jaukkummša
Teâttsuõjjasetõõzz 17. artikla mieʹldd rekisterõsttum oummust lij vuõiggâdvuõtt õõlǥted rekisteeʹrest åårrai jiiʹjjes kuõskki persoonteâđ jaukkummuž rekisteeʹrest.
Tiʹllʼjeei vuäitt jårrâʹstted oođâsǩeʹrjjtiʹllʼjõõzz, teʹl teâđ jäuʹǩǩe rekisteeʹrest. Teâđaid vueiʹtet še jaukkeed rekisteeʹrest oođâsǩeeʹrj tiʹllʼjeei raukkmõõžžin, seämmast tiʹllʼjõs poott. Vuõlttâd raukkmõõžž teâđai jaukkummšest addrõʹsse viestinta(at)kela.fi.
14 Vuõiggâdvuõtt tuejjeed läittmõõžž vuåppâmveʹrǧǧnekka
Teâttsuõjjasetõõzz 77. artikla mieʹldd rekisterõsttum oummust lij vuõiggâdvuõtt tuejjeed läittmõõžž teâttsuõjjväʹlddnekka, jõs son ǩeäčč, što Kela tuejjad persoonteâđai ǩiõttʼtõõllmõõžžâst EU teâttsuõjjasetõõzz vuâstta.