Dieđut Kelas ja Kela doarjagiin sámegillii

Kela dikšu Suomas sosiáladorvvu. Dasa gullet ovdamearkan máná riegádeapmái, bargguhisvuhtii, buohcuvuhtii, ássamii ja ealáhatahkái gulavaš áigáiboahtináššit.

Dán siidui leat čohkkejuvvon Kela sámegielat materiála: čielgagielat brošyrat ja skovit. Materiálat leat davvisámegillii. Brošyrat, mat muitalit doarjagiin, leat guhtta ja dat leat juhkkon eallindiliid mielde. Doarjagiid mearit dárkkistuvvojit jahkásaččat. Eanemus geavahuvvon ohcanskovit leat jorgaluvvon davvisámegillii. Oktiibuot Kelas leat measta 300 skovi, mat gávdnojit Kela internetsiidduin suoma- ja ruoŧagillii ja máŋggat maiddái eaŋgalsgillii.

Nu skovit go brošyrat leat pdf-hámis. Daid geavaheapmi eaktuda sierra prográmma, omd. Adobe Reader heive dárkkuhussii. Prográmma sáhttá luđet nuvttá Adobe internetsiidduin (suomagillii). Skoviid doibmema sihkkarastima dihte ávžžuhat ođđaseamos Reader-veršuvnna geavaheami. Devdojuvvon skovi sáhttá sáddet poastta fáro man beare Kela doaimmahahkii. Doaimmahagaid oktavuođadieđuid gávnnat bálvalanbáikki ohcamiin (suomagillii).

Máŋggaid Kela ovdduid sáhtát ohcat interneahtas Kela áššedikšunbálvalusas (suoma- dahje ruoŧagillii). Bálvalussii čálihat sisa iežat internetbáŋkodovddaldagain dahje digitálalaš persovdnakorttiin. Bálvalusas oainnát maiddái du dahkan ohcamušaid, du ožžon reivviid ja maiddái doarjagiid máksinbeivviid ja meriid. Bálvalus lea suoma- ja ruoŧagillii.

Áššedikšun sámegillii

Dus lea vuoigatvuohta dikšut áššiid Kelas sámegillii. Juos háliidat persovnnalaš rávvema sámegillii

  1. maŋŋebárgga ja duorastaga diibmu 9-11 sáhtát riŋget davvisámegielat telefonbálvalussii tel. 020 634 0402, dahje váldit videooktavuođa
  2. eará áigge riŋge dan Kela bálvalannummirii (suomagillii), man ášši guoská
  3. guođe riŋgenbivdaga. Almmut oktavuođadieđuid, persovdnanummira ja maiddái giela, mainna háliidat bálvalusa (davvisámegiella, nuortalašgiella, anárašgiella)
  4. Kelas sámegielat virgeolmmoš dahje Kela ordnen dulka riŋge dutnje ruovttoluotta soahpan dihte dulkonáigges.

Molssaevttolaččat sáhtát maiddái sáddet vástideaddji dieđuid šleađgapoasttain Kela Anára doaimmahaga šleađgapostii inari(at)kela.fi.

Sáhtát maiddái dikšut áššiid man beare Kela doaimmahagas dahje bálvalanbáikkis. Dárbbu mielde dulkon lágiduvvo gáiddusdulkomin telefovnna dahje videodulkonrusttegiid bokte, juos doaimmahagas ii leat sámegielat bargi. Sáhtát maiddái fápmudahttit nuppi olbmo dikšut áššiid iežat beales. Fápmudusa galgá bargat čálalaččat, muhto dat sáhttá leat friijahápmásaš.  Sierradáhpáhusain fápmudusa sáhttá bargat njálmmálaččat. Dábálaš áššiin, main ii leat mearkkašupmi vuoigatvuođadorvvu dáfus, dulkan sáhttá doaibmat maiddái áššehasa fuolki dahje ustit.  Vuollái 18- jahkásaš ii goittotge oaččo doaibmat dulkan.

Brošyrat

Doarjagat

Almmolaš ássandoarjja (pdf).

Bargguhisvuođa áigge doarjagat (pdf).

Buohcuvuođa áigge doarjagat ja veajuiduhttin (pdf). Buohcuvuhtii gullevaš buhtadusat ja beaiveruđat, veajuiduhttin ja lápmásiiddoarjagat.

Ealáhatolbmo doarjagat (pdf). Ealáhagat, ássama doarjagat ja dikšundoarjja.

Fárren Supmii dahje Suomas olgoriikii (pdf). Goas dus lea vuoigatvuohta Kela doarjagiidda? Mii dáhpáhuvvá go fárret olgoriikii?

Mánnábearrašiid doarjagat (pdf). Bearašovddut ja doarjagat máná buohccádettiin.

Stuđeantta ja vearjogeatnegasa doarjagat (pdf).

Vuođđoáigáiboahtindoarjja (pdf). Maŋimuš saji ekonomalaš doarjja.

Veajuiduhttin

IKKU – veajuiduhttinkursa eallilan olbmuide, geain leat máŋggat buozalmasat (pdf).

Oapmahašdikšuid veajuiduhttinkurssat (pdf).

TULES – duvdda- ja lihkadanorgánabuozalmasaid veajuiduhttinkurssat sámegielagiidda (pdf).

Kela táksemátkkit

Ná diŋgot Kela buhtten táksse (pdf).

Skovit

Davvisámegiel skovit

Edniidpáhka vuosttasgirji

Sallalagaid unnoraččain