Tiätu Kelast já Kela torjuin sämikielân

Kela tipšo sosiaaltorvo Suomâst. Taas kuleh ovdâmerkkân párnáá šoddâmân, pargottesvuotân, puácuvuotân, asâmân já iäláttâhahan lohtâseijee áigápuátuääših.

Taan siijđon lii čuákkejum Kela sämikielâlâš materiaal: tieđettemčáluseh já luámáttuvah. Materiaaleh láá tavesämikielân.  Hiäđuin muštâleijee tieđettemčáluseh láá kuttâ já toh láá juohum jieškote-uv eellimtile mield. Torjui mereh rekinistojeh ihásávt. Enâmustáá kevttum uuccâmluámáttuvah láá jurgâlum tavesämikielân. Ohtsis Kelast láá masa 300 luámáttuvâd, moh kávnojeh Kela internetsiijđoin suomâkielân já ruotâkielân já maaŋgah meid eŋgâlâskielân.

Sehe luámáttuvah et tieđettemčáluseh láá pdf-häämist. Toi kevttim váátá sierânâs ohjelm, om. Adobe Reader suápá uáivilân. Ohjelm puáhtá luođiđ nuuvtá Adobe viärmádâshsiijđoin (suomâs). Luámáttuvâi toimâm visásmitmân avžuuttep uđđâsumos Reader-versio kevttim. Tevdum luámáttuv puáhtá postâdiđ moos peri Kela toimâttâhân. Toimâttuvâi ohtâvuođâtiäđuid kaavnah ucâmáin palvâlemčuágástuv (suomâs).

Maaŋgâid Kela hiäđuid puávtáh uuccâđ viärmáduvâst Kela ášástâllâmpalvâlmist (suomâs). Palvâlmân peesah jieijâd viärmádâhtubdâlduvâiguin tâi šleđgâlâš persovnkorttáin. Palvâlmist uáináh meiddei jieijâd ráhtám ucâmušâid, jieijâd finnim reeivâid sehe torjui mäksupeeivijd já meerijd. Palvâlem lii suomâkielân já ruotâkielân.

Ášástâllâm sämikielân

Tust lii vuoigâdvuotâ ášástâllâđ  Kelast sämikielân. Jis halijdâh persovnlii ravvim sämikielân

  1. suáiti ton Kela palvâlemumerân (suomâs), maid äšši kuáská
  2. kyede suáittupivdem. Almoot jieijâd ohtâvuođâtiäđuid, persovntubdâluv sehe kielâ, moin halijdâh palvâlem (tavesämikielâ, nuorttâsämikielâ, aanaarsämikielâ)
  3. Kelast sämikielâlâš virgeolmooš tâi Kela ornim tulkkâ suáittá tunjin maasâd tulkkumääigist sooppâmdiet.

Molsâiävtulávt puávtáh vuolgâttiđ västideijee tiäđuid meid šleđgâpostáin Kela Aanaar toimâttuv šleđgâpoostân inari(at)kela.fi.

Puávtáh meiddei ášástâllâđ mast peri Kela toimâttuvâst tâi palvâlemčuágástuvâst. Táárbu mield tulkkum uárnejuvvoo káidustulkkuumân puhelin tâi videotulkkumpiergâsij vievâst, jis toimâttuvâst ij lah sämikielâlâš pargee finniimist.

Puávtáh meiddei adeliđ vääldi nube ulmui ášástâllâđ tuu peeleest. Vääldi kalga adeliđ kirjálávt, mut tot puáhtá leđe rijjâhámásâš. Spiekâstâhtábáhtusâin vääldi puáhtá adeliđ njálmálávt-uv. Almosluándusijn aašijn, main ij lah merhâšume vuoigâdvuođâtorvo tááhust, puáhtá tulkkân toimâđ meid äššigâš hyelkki tâi ustev.  Vuálá 18-ihásiih iä kuittâg uážu toimâđ tulkkân.